ஊடகவியலாளர்கள், தபால் சேவை ஊழியர்களுக்கும் தடுப்பூசி வழங்குங்கள் - சுகாதார அமைச்சுக்கு எழுத்து மூலம் ஊடக அமைச்சு கோரிக்கை

ஊடகவியலாளர்களுக்கும் மிக விரைவாக கொவிட் வைரஸ் தடுப்பூசியை வழங்குமாறு வெகுஜன ஊடக அமைச்சின் செயலாளரினால் சுகாதார அமைச்சின் செயலாளருக்கு எழுத்து மூலமான கோரிக்கையொன்று விடுக்கப்பட்டுள்ளது.

ஊடகவியலாளர்களினால் மேற்கொள்ளப்படுகின்ற கடமைகளின் தன்மையைப் பொறுத்து அவர்கள் பல்வேறு ஊடகவியலாளர் சந்திப்புக்களில் கலந்துகொள்ள வேண்டியுள்ளதால் இக்கோரிக்கை விடுக்கப்பட்டுள்ளது.

மக்களுக்கு தகவல்களை வழங்குவதில் தமக்கு ஏற்படும் ஆபத்தையும் பொருட்படுத்தாது செயற்படுவதனால் வெகுஜன ஊடக அமைச்சுக்குட்பட்ட சகல நிறுவனங்களினதும் ஊழியர்கள் மற்றும் ஊடகவியலாளர்களுக்கும் தடுப்பூசியை வழங்குமாறு அமைச்சின் செயலாளர் கேட்டுக் கொண்டுள்ளார்.

வெகுஜன ஊடக அமைச்சர் கெஹலிய ரம்புக்வெல்லவின் ஆலோசனைக்கமைய, அமைச்சின் செயலாளர் இந்தக் கோரிக்கையை சுகாதார அமைச்சின் செயலாளரிடம் முன்வைத்துள்ளார்.

அத்துடன் இதற்கு முன்னரும் கொவிட்-19 வைரஸ் பரவல் தடுப்புக்கான தேசிய பணிக்குழுவுக்கு இந்த தடுப்பூசியை வழங்குமாறு அமைச்சர் கெஹெலிய ரம்புக்வெல்ல கோரிக்கை விடுத்துள்ளார்.

மேலும் பல ஊடக அமைப்புக்கள் மற்றும் ஊடக நிறுவனங்களில் நிலவும் சூழ்நிலைக்கமைய ஊடகவியலாளர்களுக்கு தடுப்பூசியை வழங்குமாறும் பல்வேறு கோரிக்கைகள் வந்துள்ளன.

மேலும் பொதுமக்களுக்கு தேவையான மருந்துகள், கடிதங்கள் மற்றும் பொதிகள் என்பவற்றை விரைவாக பெற்றுக் கொள்வதற்காக உதவும் தபால் சேவை ஊழியர்களுக்கும் இந்த ஆபத்தான நிலைமை இருப்பதனால், இவர்களுக்கும் கொவிட் தடுப்பூசியை வழங்குமாறு வெகுஜன ஊடகத்துறை அமைச்சின் செயலாளர் சுகாதார அமைச்சின் செயலாளருக்கு கோரிக்கை விடுத்துள்ளார்.