அமெரிக்காவில் பரவும் புதிய வைரஸ் : எச்சரிக்கையாக இருப்பதாக இலங்கை தெரிவிப்பு !

(என்.வீ.ஏ.)

அமெரிக்காவில் HMPV எனப்படும் அதிகம் அறியப்படாத சுவாச வைரஸ் அண்மைக்காலமாக அதிகரித்து வருவதை அடுத்து, வைரஸின் புதிய விருத்திகளை உன்னிப்பாக அவதானித்து வருவதாகவும் எச்சரிக்கையுடன் இருப்பதாகவும் இலங்கை சுகாதார அதிகாரிகள் தெரிவித்தனர்.

வெளிநாட்டில் பரவும் எந்தவொரு புதிய நோயும் இலங்கைக்கு அச்சுறுத்தலாக அமையலாம் என சுகாதார அமைச்சு எப்போதும் எச்சரிக்கையுடன் இருப்பதாக சுகாதார அமைச்சின் வைத்தியர் அன்வர் ஹம்தானி தெரிவித்தார்.

'அமெரிக்காவில் பரவும் வைரஸைப் பொருத்தவரை, நாங்கள் நிலைமையை கண்காணித்து வருகிறோம்' என அவர் கூறினார்.

இதேவேளை, சுகாதார அமைச்சின் மற்றொரு அதிகாரி 'அமெரிக்காவிற்கு வெளியே இது ஆபத்தான கட்டத்தை எட்டவில்லை என்பதால் மக்கள் பீதியடையத் தேவையில்லை. இருப்பினும், கோவிட்-19 தொற்று நோயை நாங்கள் கண்டதுபோல் எல்லைகளுக்கு அப்பால் பரவுவதற்கான வாய்ப்பு எப்போதும் இருக்கிறது' என்றார்.

மனித metapneumovirus அல்லது HMPV என்பது ஒரு வைரஸ் தொற்று ஆகும், மேலும் இது முதற்கட்டமாக மேல் சுவாசக் குழாயைப் பாதிக்கிறது. 2001 ஆம் ஆண்டில் முதன்முதலில் கண்டுபிடிக்கப்பட்ட இந்த வைரஸ், பொதுவாக அறியப்பட்ட சுவாச ஒத்திசைவு வைரஸ் அல்லது RSV உடன் Pneumoviridae குழுமத்தில் இருக்கிறது.

நோய் கட்டுப்பாடு மற்றும் தடுப்பு நிலையங்களின் (CDC) அறிக்கைகளின் பிரகாரம் மார்ச் நடுப்பகுதியில் அதன் உச்சத்தில், கிட்டத்தட்ட 11 சதவிகிதம் சோதனை செய்யப்பட்ட மாதிரிகள் அமெரிக்காவில் HMPV க்கு நேர்மறையாக இருந்தன, இது சராசரியை விட 36 சதவிகிதம் அதிகம்.

இந்த வைரஸ் சளி, காய்ச்சல் மற்றும் கோவிட்-19 போன்று குறைந்த நுரையீரல் தொற்று, சிறிய அல்லது அடிக்கடி இருமல் ஏற்படுதல், சளி, தொண்டைப் புண் மற்றும் காய்ச்சல் ஆகிய அறிகுறிகளை ஏற்படுத்துகிறது.

பொதுவாக, இளம் பிள்ளைகள் மற்றும் வயதானவர்கள் HMPV நோயால் பாதிக்கப்பட்ட பிறகு மிகவும் கடுமையான நோயுடன் நோய்க்குள் தள்ளப்படுகிறார்கள். ஏனெனில் அவர்கள் வைரஸால் மிகவும் பாதிக்கப்படக்கூடியவர்கள். 

HMPV க்கு தடுப்பூசி அல்லது வைரஸ் தடுப்பு மருந்து இல்லாததால், அவர்களின் நோய் அறிகுறிகளுக்கு மருத்துவர்களால் நேரடியாக சிகிச்சையளிக்கப்படுகிறது.

HMPV வைரஸ், இருமல், தும்மல், தொடுதல் அல்லது கை குலுக்குதல், வைரஸ் உள்ள பொருட்கள் அல்லது பரப்புகளைத் தொடுதல் மற்றும் ஒருவருடன் நெருங்கிய தொடர்பு மூலம் பாதிக்கப்பட்ட நபரிடமிருந்து மற்றவர்களுக்குப் பரவ வாய்ப்புள்ளது.

இருமல் அல்லது தும்மலின்போது வாய் மற்றும் மூக்கை மூடிக்கொள்வது மற்றும் அடிக்கடி கை கழுவுதல் போன்ற நல்ல சுகாதாரத்தை முதன்மை அணுகுமுறை ஆகும்.

இந்த நோய் தொடர்பில் கருத்து தெரிவித்த அரசாங்க மருத்துவ அதிகாரிகள் சங்க ஊடகப் பேச்சாளர் டொக்டர் சமில் விஜேசிங்க, 'இந்த தொற்று அவசர நிலையை எட்டாதபோதிலும் விமான நிலையங்கள், துறைமுகங்கள் ஆகிய இலங்கை நுழைவாயில்கள் ஊடாக தொற்றாளர்கள் வருவதைத் தடுக்க கண்காணிப்புகள் அதிகரிக்கப்பட்டுள்ளது.

'உலக சுகாதார ஸ்தாபனம் இன்னும் அவசர நிலையை பிரகடனப்படுத்தவில்லை. அமெரிக்காவில் தொற்றுகள் அதிகரித்து வருகின்றன. இருப்பினும், COVID-19 தொற்றுநோய் போன்ற அழிவைத் தவிர்க்க இலங்கை அவதானத்துடன் செயற்படுவது நல்லது' என்றார்.