முஸ்லிம் தனியார் சட்டத்தை திருத்த கடந்த ஆட்சியில் நாங்கள் நிறையவே முயற்சி செய்தோம். தலதா அத்துகோரள நீதியமைச்சராக இருந்தபோது அவரோடு நிறைய முரண்பாடுகள் தொடர்பாக பேசி பல விடயங்களுக்கு தீர்வு கண்டோம். ஒரு சிறிய கூட்டம் விதண்டாவாதமாக சில விடயங்களை விட்டுக் கொடுக்காததால் இந்த விடயத்துக்கான தீர்வினைக் காண முடியாமல் போனது. இல்லையென்றால் கடந்த ஆட்சியிலேயே இந்த விவகாரம் நிறைவுக்கு வந்திருக்கும் என ஸ்ரீ லங்கா முஸ்லிம் காங்கிரஸ் தலைவரும் பாராளுமன்ற உறுப்பினருமான ரவூப் ஹக்கீம் தெரிவித்தார்.
வீரகேசரியின் ‘சமகாலம்’ அரசியல் கலந்துரையாடல் நிகழ்ச்சியில் கலந்து கொண்டு கருத்து வெளியிடும் போதே அவர் இவ்வாறு குறிப்பிட்டார்.
முஸ்லிம் தனியார் சட்ட திருத்தங்கள் குறித்து தற்போது எழுந்துள்ள விமர்சனங்கள் குறித்து கருத்து வெளியிட்ட போதே அவர் இவ்வாறு குறிப்பிட்டார்.
அவர் மேலும் குறிப்பிடுகையில், நீதியமைச்சர் அலி சப்ரிக்கு ஏற்பட்டுள்ள நெருக்கடிகளை நான் முழுமையாக உணர்ந்து கொள்கிறேன். இப்படியொரு ஆட்சியில் ஒரு தனி இனத்தை பிரதிநிதித்துவப்படுத்தும் அமைச்சராக அவர் தன்னை அடையாளப்படுத்துவது அவருக்கு சிக்கலான ஒன்றாக மாறியிருக்கிறது. அவருக்காக நான் பச்சாதாபப்படுகின்றேன். ஒரு புரிந்துணர்வோடு நாங்கள் அவரைப் பார்க்க வேண்டும். அவரை ஒரு நெருப்புக் குழியினுள் தள்ளிவிட முடியாது.
நாங்கள் ஒரு எதிர்க்கட்சி என்ற வகையில் சமயோசிதமாக செயற்பட வேண்டுமே தவிர எடுத்த எடுப்பிலேயே அலி சப்ரியை குறை சொல்லி விட முடியாது.
இந்த விடயங்களை சிவில் அமைப்புகளுடன் கதைக்கும்போது தன்னுடைய விசனத்தை தனிப்பட்ட முறையில் அவர் வெளியிட்டிருக்கிறார். பொதுவெளியில் அதுபற்றி பேச முடியாத நிலையில் அவர் இருக்கிறார் என்பதை புரிந்துகொண்டு இதற்கான தீர்வை நாங்கள் காண வேண்டும்.
முஸ்லிம் விவாக மற்றும் விவாகரத்துச் சட்டம் தொடர்பான சர்ச்சைகள் தொடர்பாக கலந்துரையாடிய அனைத்து கூட்டங்களிலும் நாங்கள் கலந்து கொண்டிருக்கிறோம்.
கடந்த ஆட்சியில் நாங்கள் நிறையவே முயற்சி செய்தோம். தலதா அத்துகோரள நீதியமைச்சராக இருந்தபோது அவரோடு நிறைய முரண்பாடுகள் தொடர்பாக பேசி பல விடயங்களுக்கு தீர்வு கண்டோம். ஒரு சிறிய கூட்டம் விதண்டாவாதமாக சில விடயங்களை விட்டுக்கொடுக்காததால் இந்த விடயத்துக்கான தீர்வினைக் காண முடியாமல் போனது. இல்லையென்றால் கடந்த ஆட்சியிலேயே இந்த விவகாரம் நிறைவுக்கு வந்திருக்கும்.
திருமண வயதெல்லை மற்றும் காதி நீதிபதிகளாக பெண்கள் நியமிக்கப்படல் என்பவற்றில் அர்த்தமில்லாமல் எதிர்ப்பு தெரிவித்ததே எங்களுடைய இந்த நிலைமைக்கு காரணம். இப்போது இவை இரண்டிற்குமே உடன்பாடு காணப்பட்டுவிட்டது.
முஸ்லிம் விவாக மற்றும் விகாரத்துச் சட்டத்தை சீர்திருத்தும் பணி என்ற போர்வையில் முஸ்லிம்களுக்கு என்று இருக்கின்ற அடிப்படை பொறிமுறைகளை இல்லாமல் செய்வது என்பது ஏற்றுக்கொள்ள முடியாத ஒன்றாகும். ஆனால் நீதியமைச்சர் என்ற பதவிக்கு இருக்கின்ற வலிமையைக் குறைத்து அவ்வாறான செயற்பாடுகள் நடந்து வருகின்றன என்றார்.
Vidivelli
No comments:
Post a Comment