சந்தையில் பால்மாவுக்கு பாரிய தட்டுப்பாடு : தொடர்ந்தும் நட்டத்தில் விநியோகிக்க முடியாது என்கிறது நிறுவனங்கள்

(எம்.ஆர்.எம்.வசீம்)

பால்மா இறக்குமதி செய்வதன் மூலம் ஏற்பட்டு வரும் நட்டத்தை தொடர்ந்தும் தாங்கிக் கொள்ள முடியாது என தெரிவித்து பால்மா இறக்குமதி செய்யும் நிறுவனங்கள் இறக்குமதியை நிறுத்திக் கொண்டுள்ளன. அதனால் கடந்த இரண்டு வாரங்களுக்கும் அதிக நாட்களாக சந்தைகளில் பால்மாவுக்கான தட்டுப்பாடு பாரியளவில் ஏற்பட்டு வருகின்றது.

இது தொடர்பாக, பால்மா இறக்குமதி செய்யும் நிறுவன பிரதானி ஒருவர் குறிப்பிடுகையில், உலக சந்தையில் பால்மா விலை அதிகரிப்பு, டொலரின் பெறுமதி அதிகரிப்பினால் ஏற்படும் நட்டத்தை தடுப்பதற்காக பால்மா இறக்குமதி செய்வதை நிறுத்தி இருக்கின்றோம். அதனால் தற்போது சந்தைகளில் தட்டுப்பாடு ஏற்பட்டிருக்கின்றது. இந்நிலைமையில் தொடர்ந்தும் தற்போதுள்ள விலைக்கு பால்மா விற்பனை செய்ய முடியாது.

மேலும், தற்போதுள்ள விலைக்கு பால்மா விற்பனை செய்வதன் மூலம் ஒரு கிலோ பால்மாவுக்கு 270 முதல் 300 ரூபா வரை நிறுவனங்களுக்கு நட்டமேற்படுகின்றது. பால்மாவின் விலை அதிகரிக்க கடந்த ஜனவரி மாதம் முதல் 4 தடவைகள் பால்மா இறக்குமதி செய்யும் நிறுவனங்கள் நுகர்வோர் அதிகார சபையிடம் அனுமதி கோரி இருந்தபோதும், அதற்கான அனுமதி வழங்காதமையால், கடந்த சில காலங்களாக பால்மா நிறுவனங்களுக்கு மாதம் ஒன்றுக்கு சுமார் ஆயிரத்து 500 மில்லியன் ரூபா வரை நட்டம் ஏற்பட்டு வருகின்றது.

அத்துடன் கடந்த காலங்களில் இருந்து கப்பல் கட்டணம் மும்மடங்காக அதிகரித்திருப்பதுடன் பொதியிடல் கட்டணம் நூற்றுக்கு 30 வீதம் அதிகரித்திருக்கின்றது. அதேபோன்று இன்னும் பல விடயங்கள் பால்மா நிறுவனங்களுக்கு பாதிப்பை ஏற்படுத்தியுள்ளதுடன் உலக சந்தையில் மால்மா மெட்ரிக் தொன் ஒன்று 2800 டொலருக்கு இருந்த போதும் தற்போது அது 4 ஆயிரத்து 200 டொலர் வரை அதிகரித்திருக்கின்றது.

அதனால் பால்மா விலை தொடர்பான பிரச்சினைக்கு தீர்வு எட்டப்படும் வரை, பால்மா இறக்குமதி செய்வதை நிறுத்தி, தற்போது நிறுவனங்களில் இருக்கும் தொகையை சந்தைக்கு விநியோகிப்பதை வரையறுத்து, இந்த மாதத்தில் பால்மா சந்தைக்கு விநியோகிப்பதை நூற்றுக்கு 65 வீதத்தால் குறைத்திருக்கின்றது.

எனவே தற்போது 945 ரூபாவுக்கு விற்பனை செய்யப்பட்டு வரும் ஒரு கிலோ கிராம் பால்மாவின் விலையை 1300 ரூபா வரையும் 380 ரூபாவுக்கு விற்பனை செய்யப்பட்டு வரும் 400 கிராம் பால்மாவின் விலையை 495 ரூபாவரையும் அதிகரிக்குமாறே பால்மா நிறுவனங்கள் நுகர்வோர் அதிகார சபையிடம் கோரி வருகின்றன என்றார்.