அஸ்ட்ரா செனிகா தடுப்பூசி வழங்கப்படவுள்ள இடங்கள் !

அஸ்ட்ரா செனிகா தடுப்பூசி வழங்கும் நடவடிக்கைகள் நாளை முதல் ஆரம்பமாகவுள்ளதாக சுகாதார அமைச்சர் பவித்ரா வன்னியாரச்சி தெரிவித்துள்ளார்.

ஜப்பானின் உதவியுடன் உலக சுகாதார ஸ்தாபனத்தின் கொவெக்ஸ் திட்டத்தின் ஊடாக இலங்கைக்கு 7 இலட்சத்துக்கும் அதிகமான தடுப்பூசிகள் இன்று கிடைக்கப் பெற்றன.

ஏற்கனவே இலங்கையில் அஸ்ட்ரா செனிகாவை முதல் கட்ட தடுப்பூசியாகப் பெற்று இரண்டாம் தடுப்பூசிக்காக காத்திருப்பவர்களுக்கு இந்த தடுப்பூசிகள் பயன்படுத்தப்படவுள்ளன.

இந்நிலையில் அவ்வாறு 2 ஆம் கட்ட தடுப்பூசிகள் பெறுவோருக்கு குறுஞ்செய்தி மூலம் அறிவித்தல் விடுக்கப்பட்டு வருகின்றது.

இந்நிலையில், எஞ்சியவை கேகாலை மாவட்டத்துக்கு அனுப்பி வைக்கப்படவுள்ளன.

இதன்படி நாளை முதல் கொழும்பில் 18 சுகாதார வைத்திய அதிகாரி பிரிவிலும், 8 வைத்தியசாலைகளிலும், 13 தெரிவு செய்யப்பட்ட இடங்களிலும் அஸ்ட்ரா செனிகா 2ஆம் தடுப்பூசிகள் செலுத்தப்படவுள்ளன.

அதேபோன்று, களுத்துறையில் 5 சுகாதார வைத்திய அதிகாரிகள் பிரிவிலும், கம்பஹாவில் 15 சுகாதார வைத்திய அதிகாரிகள் பிரிவிலும் 2ஆம் தடுப்பூசி செலுத்தப்படவுள்ளது.

இதேவேளை அஸ்ட்ரா செனிகா இரண்டாம் தடுப்பூசியை பெற்றுக் கொள்ளவுள்ளவர்கள் தங்களது அடையாள அட்டையுடன் தடுப்பூசி அட்டையையும் உடன்கொண்டு வருமாறு சுகாதார அமைச்சர் அறிவுறுத்தியுள்ளார்.