நாளை நடைபெறவுள்ள ஸ்ரீ முஸ்லிம் காங்கிரஸின் பேராளர் மாநாட்டை கல்குடாத் தொகுதி போராளிகள் புறக்கனிப்பு

நாளை 05.08.2018ம் திகதி ஞாயிற்றுக்கிழமை கண்டி பொல்கொல்லை மஹிந்த ராஜபக்ஷ அரங்கில் இடம்பெறவுள்ள ஸ்ரீ லங்கா முஸ்லிம் காங்கிரஸின் 28ஆவது பேராளர் மாநாட்டை புறக்கணிக்கப்போவதாக கல்குடாத் தொகுதி முஸ்லிம் காங்கிரஸ் போராளிகள் தெரிவித்துள்ளனர்.

நேற்று 03.08.2018ம் திகதி வெள்ளிக்கிழமை வாழைச்சேனை பலாஹ் பள்ளிவாயல் வீதியில் அமைந்துள்ள சகோதரர் பஸ்மி அவர்களின் இல்லத்தில் கோறளைப்பற்று வாழைச்சேனை பிரதேச சபை உறுப்பினர் எம்.ஐ.இம்தியாஸ் தலைமையில் இடம்பெற்ற ஸ்ரீ முஸ்லிம் காங்கிரஸின் முக்கியஸ்தர்கள், போராளிகள், உள்ளூராட்சி மன்ற உறுப்பினர்கள், உள்ளூராட்சி மன்ற வேட்பாளர்கள் கலந்து கொண்ட விஷேட கூட்டமொன்றின் பின்னரே இந்த தீர்மானத்திற்கு வந்துள்ளதாக தெரிவிக்கப்படுகிறது.

அண்மைக் காலமாக கல்குடாவில் முஸ்லிம் காங்கிரஸின் செயற்பாடுகள் திருப்தியற்றதாகக் காணப்படுவதுடன், கல்குடாத் தொகுதியில் கட்சியை வளர்க்கத் தேவையான முன்னெடுப்புகளை அமைப்பாளர் செய்யத்தவறி விட்டதாகவும் குற்றஞ்சாட்டியே மேற்படி தீர்மானத்திற்கு வர நேர்ந்ததாக கூட்டத்தில் கலந்து கொண்டோர் தெரிவித்தனர்.

அத்தோடு, அமைப்பாளரினால் கடந்த உள்ளூராட்சி மன்றத் தேர்தலில் வெற்றிபெற்ற வேட்பாளர்கள் மற்றும் தேர்தலில் போட்டியிட்டோர் புறக்கணிக்கப்பட்டு வருவதுடன், இவர்களை ஒன்றிணைத்து பிரதேசத்தில் கட்சியை வளர்ப்பதற்கோ அபிவிருத்திகளை மேற்கொள்வதற்கோ தவறி விட்டதாகவும் குற்றம் சுமத்தப்பட்டுள்ளது.

அத்துடன், வாழைச்சேனையில் பின்தங்கிக் காணப்படும் அபிவிருத்திகள் தொடர்பில் எந்தவித முன்னெடுப்புக்களையும் செய்யத்தவறி விட்டதாகவும் குற்றம் சாட்டியுள்ளனர்.

இவைகள் தொடர்பில் ஸ்ரீ முஸ்லிம் காங்கிரஸின் தேசியத்தலைமை அவரசத் தீர்மானத்திற்கு வர வேண்டுமென்ற கோரிக்கையை முன்வைத்து நாளை கண்டியில் நடைபெறவுள்ள கட்சியின் பேராளர் மாநாட்டை பகிஷ்கரிக்கப் போவதாக தெரிவிக்கின்றனர்.

அத்தோடு, கால தாமதமின்றி கல்குடாத் தொகுதிக்கு முழு நேரமாக இப்பிரதேசத்திலிருந்தவாறு சிறப்பாகச் செயற்படக்கூடிய புதிய அமைப்பாளரை உடனடியாக நியமனம் செய்து கட்சியின் செயற்பாடுகளை முன்னெடுக்க வேண்டுமெனவும் கோரிக்கை முன்வைக்கப்பட்டுள்ளது.

இச்செயற்பாடானது, கட்சியின் தலைமைக்கோ, கட்சிக்கோ எதிரான ஒன்றல்ல. கல்குடாப் பிரதேசத்திலுள்ள அனைத்து கட்சிப் போராளிகளையும் ஒன்றினைத்து செயற்படக்கூடிய வகையிலும், எதிர்காலத்தில் இன்னும் சிறந்த முறையில் கல்குடாத் தொகுதியில் கட்சியினை வளர்த்தெடுப்பதற்கும், முழுநேரமும் இப்பிரதேசத்திலிருந்தவாறு கட்சியினை வழி நடாத்திச் செல்லக்கூடிய ஓர் கல்குடாத் தொகுதிக்கான தலைமையினை எதிர்பார்த்தவர்களாக முன்னெடுக்கப்படும் போராட்டமாகும்.

இவ்விஷேட கூட்டத்தில் கோறளைப்பற்று மேற்கு ஓட்டமாவடி பிரதேச சபையின் உறுப்பினர்களான ஐ.எல்.பதுர்தீன், எஸ்.ஏ.அன்வர், எம்.ஐ.ஹாமித் மெளலவி, ஏ.ஜி.அஸீஸுல் றஹீம், கோறளைப்பற்று வாழைச்சேனைப் பிரதேச சபை உறுப்பினர் எம்.ஐ.இம்தியாஸ் மற்றும் கட்சியின் முக்கியஸ்தர்களும் கலந்து கொண்டனர்.

வாழைச்சேனை எஸ்.ஐ.எம்.நிப்ராஸ்