எஸ்.எம்.எம்.முர்ஷித்2024ஆம் ஆண்டு உலக புகைத்தல் தடுப்பு தினத்தை முன்னிட்டு தேசிய ரீதியில் நடாத்தப்பட்ட குறுக்கெழுத்துப் போட்டியில் ஐம்பது பரிசில்களில் இருபத்தி மூன்று (23) பரிசில்களை ஓட்டமாவடி கல்விக் கோட்டம் பெற்று சாதனை படைத்துள்ளது.
2024ஆம் ஆண்டு உலக புகைத்தல் தடுப்பு தினத்தை முன்னிட்டு சுகாதார அமைச்சின் தொற்றாநோய்ப் பிரிவு மற்றும் மதுசாரா போதைப் பொருள் நிலையம் இணைந்து நாடளாவிய ரீதியில் பாடசாலை மாணவர்களுக்கிடையில் நடாத்திய திறந்த போட்டியில் ஓட்டமாவடி பிரதேச செயலாளர் பிரிவிலிருந்து இரண்டு பாடசாலை மாணவர்கள் கலந்துகொண்டு இரண்டு பாடசாலைகயிலும் இருந்து இருபத்தி மூன்று மாணவர்கள் பரிசில்களைப் பெற்றுள்ளனர்.
வெற்றி பெற்றவர்களுக்கான பரிசில்கள் அமைச்சினூடாக அனுப்பப்பட்டு இன்று (24.06.2024) திங்கட்கிழமை வெற்றி பெற்றமாணவர்களுக்கு ஓட்டமாவடி சுகாதார வைத்திய அதிகாரி டாக்டர் எம்.எச்.எம். தாரிக் தலைமையில் சுகாதார வைத்திய அதிகாரி காரியாலயத்தில் வைத்து வழங்கி வைக்கப்பட்டது.
பரிசில்கள் வழங்கும் நிகழ்வில் ஓட்டமாவடி பிரதேச செயலக பிரதி திட்டமிடல் பணிப்பாளர் எஸ்.ஏ. றியாஸ், வாழைச்சேனை இலங்கை மின்சார சபையின் மின் பொறியலாளர் எச்.எம்.எம். றியால், வாழைச்சேனை பொலிஸ் நிலைய மோட்டார் போக்குவரத்து பொறுப்பதிகாரி டபள்யூ.ஜி.ஜே. ஹேரத், தாருல் உலூம் வித்தியாலய அதிபர் எம்.எல்.எம். பைஸல், மேற்பார்வை பொதுச் சுகாதாரப் பரிசோதகர் ஏ.எல். நௌபர், சுகாதார வைத்திய அதிகாரி அலுவலக உத்தியோகத்தர்கள் வெற்றி பெற்ற மாணவர்களின் பெற்றோர்கள் எனப்பலரும் கலந்து கொண்டனர்.
ஓட்டமாவடி தாருல் உலூம் பாடசாலையிலிருந்து நூற்றி எழுபத்திரெண்டு (172) மாணவர்கள் பங்குபற்றி இருபத்திரெண்டு மாணவர்களும், ஓட்டமாவடி மத்திய கல்லூரி (தேசிய பாடசாலை) யிலிருந்து ஒருவர் போட்டியில் கலந்துகொண்டு அவர் வெற்றி பெற்றுள்ளதுடன், மொத்தமாக தேசியத்தில் தெரிவு செய்யப்பட்ட ஐம்பது வெற்றியாளர்களில் இருபத்தி மூன்று வெற்றியாளர்களை ஓட்டமாவடி கல்விக் கோட்டம் தனதாக்கிக் கொண்டுள்ளது.
நாடளாவிய ரீதியில் ஐம்பது பரிசில்களில் இருபத்தி மூன்று பரிசில்கள் ஓட்டமாவடி சுகாதார வைத்திய அதிகாரி பிரிவிற்கு கிடைக்கப் பெற்றுள்ளது. இது மட்டக்களப்பு மாவட்டத்திற்கும் கிழக்கு மாகாணத்திற்கும் கிடைத்த வெற்றியாகும்.
இவ்வெற்றிக்கு பங்களிப்புச் செய்த அனைவருக்கும் நன்றி தெரிவிப்பதுடன், குறிப்பாக, ஓட்டமாவடி தாருல் உலூம் வித்தியாலய அதிபர் எம்.எல்.எம். பைஸலுக்கு எங்கள் அலுவலகம் சார்பாகவும் எனது சார்பாகவும் மனமார்ந்த நன்றிகளைத் தெரிவித்துக் கொள்வதாக சுகாதார வைத்திய அதிகாரி டாக்டர் எம்.எச்.எம். தாரிக் தெரிவித்தார்.
No comments:
Post a Comment