நாடு முக்கியமா ? சாப்பாடு முக்கியமா ? - பாராளுமன்றத்தில் இறுதியில் வெற்றி பெற்றது சாப்பாடே - News View

Breaking

Wednesday, October 6, 2021

நாடு முக்கியமா ? சாப்பாடு முக்கியமா ? - பாராளுமன்றத்தில் இறுதியில் வெற்றி பெற்றது சாப்பாடே

(ஆர்.யசி, எம்.ஆர்.எம்.வசீம்)

பாராளுமன்றம் இன்று புதன்கிழமை இடம்பெற்றுக் கொண்டிருந்த வேளையில் பெற்றோலிய வளங்கள் தொடர்பான விவாதம் ஆரம்பிக்கப்படவிருந்த நிலையில் வெள்ளைப்பூண்டு, லிற்றோ காஸ் தொடர்பில் அரச, எதிர்க்கட்சியினரிடையில் நீண்ட நேரமாக வாதப்பிரதிவாதங்கள் இடம்பெற்றன.

வெள்ளைப்பூண்டு மோசடி தொடர்பில் எதிர்க்கட்சி தெரிவித்த குற்றச்சாட்டுக்கு வர்த்தக அமைச்சர் பந்துல குணவர்தன நீண்ட விளக்கம் ஒன்றை வழங்கிக் கொண்டிருந்தார். ஆனால் முக்கியமான விவாதம் இருப்பதாகவும் அமைச்சர் நேரத்தை வீணடிப்பதாகவும் கூறி இதற்கு எதிர்க்கட்சியினர் எதிர்ப்புத் தெரிவித்தனர்.

ஆனால் அரசு தரப்பினர் அமைச்சருக்கு விளக்கமளிக்கும் உரிமை உள்ளதென வாதிட்டு அமைச்சரை விளக்கமளிக்க அனுமதிக்குமாறு சபாநாயகரை கோரினர்.

அப்படியானால் அமைச்சர் நீண்ட நேரம் விளக்கமளிப்பதனால் 12.30 மணியிலிருந்து 1.30 மணி வரையிலான உணவுக்கான நேரத்தையும் விவாதத்திற்கு எடுக்க வேண்டும் என எதிர்க்கட்சியினர் சபாநாயகரிடம் கோரினர். ஆனால் அவ்வாறான கோரிக்கை அரச தரப்பிடமிருந்தே விடுக்கப்பட்ட வேண்டுமென சபாநாயகர் கூறினார்.

எனினும் உணவுக்கான நேரத்தை விவாதத்திற்கு எடுக்க அமைச்சர் ரோஹித அபேகுணவர்தன கடும் எதிர்ப்புத் தெரிவித்தார். தாம் உணவருந்த நேரம் வேண்டும் என்றார்.

அப்போது எழுந்த எதிர்க்கட்சி எம்.பியான நளின் பண்டார, நாம் நாடு முக்கியம் என்கின்றோம். அமைச்சர் சாப்பாடு முக்கியம் என்கின்றார். நாடா சாப்பாடா முக்கியம் என்பதனை சபாநாயகரின் முடிவில் பார்ப்போம் என்றார்.

இந்நிலையில் 11 மணிக்கு ஆரம்பமாக வேண்டிய பெற்றோலிய வளங்கள் தொடர்பான விவாதம் 12.15 மணியளவிலேயே ஆரம்பமானது.

விடயத்துக்கு பொறுப்பான அமைச்சரான உதய கம்மன்பில உரையாற்றிக் கொண்டிருந்த போது, 12.30 மணிக்கு உணவு நேரத்துக்காக சபை நடவடிக்கை 1.30 மணி வரை ஒத்தி வைக்கப்படுவதாக சபாநாயகர் மஹிந்த யாப்பா அபேவர்தன அறிவித்து சபையை உணவுக்காக ஒத்தி வைத்தார்.

ஆக நாடா சாப்பாடா முக்கியம் என்ற எதிர்க்கட்சியின் கேள்விக்கு சாப்பாடுதான் முக்கியம் என்ற பதிலே சபை ஒத்தி வைப்பின் மூலம் கிடைத்தது.

No comments:

Post a Comment