கரீபியன் பிரீமியர் லீக் தொடரில் சென். கைட்ஸ் அண்ட் நெவிஸ் பேட்ரியட்ஸ் சம்பியன் பட்டத்தை வென்றது

எம்.எம்.சில்வெஸ்டர்

கரீபியன் பிரீமியர் லீக்கின் இருபதுக்கு 20 கிரிக்கெட் தொடரில் சென் லூசியா கிங்ஸ் அணிக்கெதிரான இறுதிப் போட்டியில் டொமினிக் டிரேக்ஸின் அதிரடியான துடுப்பாட்டம் கைகொடுக்க சென். கைட்ஸ் அண்ட் நெவிஸ் பேட்ரியட்ஸ் அணி 3 விக்கெட்டுகளால் வெற்றியீட்டி சம்பியன் பட்டத்தை வென்றது.

கடந்த புதனன்று இரவு நடைபெற்ற இப்போட்டியில் முதலில் துடுப்பெடுத்தாடிய சென். லூசியா கிங்ஸ் அணி 20 ஓவர்களில் 7 விக்கெட்டுகளை இழந்து 159 ஓட்டங்களை பெற்றது.

அவ்வணி சார்பில் ரஹ்கீம் கோர்ன்வல் 32 பந்துகளில் 43 ஓட்டங்களையும், ரோஸ்டன் சேஸ் 40 பந்துகளில் 43 ஓட்டங்களையும் அதிகபட்சமாகப் பெற்றுக் கொடுத்தனர்.

எனினும், இறுதிக் கட்டத்தில் அதிரடியாக துடுப்பெடுத்தாடிய கீமோ போல் 5 சிக்ஸர்களை விளாசி 21 பந்துகளில் 39 ஓட்டங்களை அதிரடியாக குவித்தார். பந்துவீச்சில் பவாட் அஹமட், நஸீம் ஷா இருவரும் தலா 2 விக்கெட்டுகளை வீழ்த்தினர்.

160 ஓட்டங்களை நோக்கி பதிலுக்குத் துடுப்பெடுத்தாடிய சென்.கைட்ஸ் அணி 20 ஆவரின் கடைசிப் பந்தில் வெற்றி இலக்கை அடைந்து 3 விக்கெட்டுகளால் வெற்றியீட்டியது.

அவ்வணியின் டொமினிக் டிரேக்ஸ் 24 பந்துகளில் 3 சிஸ்சர்கள், 3 பவுண்டரிகள் அடங்கலாக ஆட்டமிழக்காமல் 48 ஓட்டங்களை பெற்று சென்.கைட்ஸ் அணியை முதல் தடவையாக சம்பியன் பட்டத்தை வெல்ல காரணமாக அமைந்ததுடன் இறுதிப் போட்டியின் நாயகனாகவும் தெரிவானார்.

போட்டித் தொடரின் நாயகனாக சென். லூசியா அணியின் ரோஸ்டன் சேஸ் தெரிவானார்.