11 இளைஞர்கள் கடத்தப்பட்டு காணாமல் ஆக்கப்பட்ட வழக்கு : சட்டமா அதிபர் திணைக்களம் முடிவை தெளிவுபடுத்த வேண்டும் என்கிறது சர்வதேச மன்னிப்புச் சபை

11 தமிழ் இளைஞர்கள் கடத்தப்பட்டு, காணாமல் ஆக்கப்பட்டதாக கூறப்படும் வழக்கில் வசந்த கரன்னகொடவுக்கு எதிரான குற்றச்சாட்டுகளை தொடர வேண்டாம் என்ற சட்டமா அதிபர் திணைக்களத்தின் முடிவுக்கான காரணத்தை தெளிவுபடுத்த வேண்டும் என்று சர்வதேச மன்னிப்புச் சபை கோரியுள்ளது.

சர்வதேச மன்னிப்பு சபையின் ஆசிய - பசிபிக் பிராந்திய பணிப்பாளர் யாமினி மிஸ்ரா சட்டமா அதிபர் திணைக்களத்தின் இந்த முடிவுக்கு பதிலளிக்கையில், பல தசாப்தங்களாக பல்லாயிரக்கணக்கான மக்கள் வலுக்கட்டாயமாக காணாமல் போன நிலையில், உலகின் இரண்டாவது அதிக எண்ணிக்கையிலான கட்டாய காணாமல் ஆக்கங்களில் இலங்கை உள்ளது.

இந்த வழக்கு, சர்வதேச சட்டத்தின் கீழ் குற்றங்களுக்கு நீதி வழங்குவதற்கான வாய்ப்பாக இருந்தது, குற்றவியல் பொறுப்பில் சந்தேகத்திற்குரியவர்கள், உதவி மற்றும் ஊக்குவிப்பு மற்றும் கட்டளை பொறுப்பின் கீழ் சம்பந்தப்பட்டவர்கள் உட்பட விசாரணைக்கு கொண்டுவரப்படுவதை உறுதி செய்தது.

இந்த வழக்கு ஏற்கனவே இலங்கை நீதிமன்றங்களில் உள்ள தடைகளால் சூழப்பட்டுள்ளது, இன்றைய (நேற்றுமுன்தினம் ) முடிவு பாதிக்கப்பட்டவர்களின் குடும்பங்களுக்கு நீதியை மேலும் சென்றடைவதை தடுக்கிறது.

சட்டமா அதிபர் திணைக்களம் அதன் முடிவிற்கான காரணங்களை விளக்க வேண்டும், மேலும் இலங்கை அதிகாரிகள் கட்டாய காணாமல் போன அனைத்து பாதிக்கப்பட்டவர்களுக்கும் உண்மை, நீதி மற்றும் இழப்பீடுகளை வழங்க வேண்டும்.

பின்னணி

"கடற்படை 11" வழக்கு 2008-2009 இல் 11 தமிழ் இளைஞர்கள் கட்டாயமாக காணாமல் போனதைக் குறிக்கிறது. இதில் சிரேஷ்ட இராணுவத் தளபதிகள் சம்பந்தப்பட்டுள்ளனர்.

2018 ஆகஸ்டில் குற்றவியல் புலனாய்வுத் துறை (சி.ஐ.டி.) முக்கிய சந்தேகநபராக "நேவி சம்பத்" என்று அழைக்கப்படும் லெப்டினன்ட் கமாண்டர் சந்தனா பிரசாத் ஹெட்டியாராச்சியை கைது செய்தது.

முக்கிய சந்தேக நபர்களில் ஒருவரை பாதுகாப்புத் துறை தலைமை அதிகாரி அட்மிரல் ரவீந்திர விஜேகுணரத்ன பாதுகாத்தார் என்று சிஐடி குற்றம் சாட்டியது, மேலும் அவரை கைது செய்ய நீதிமன்றம் உத்தரவிட்டது.

2019 பெப்ரவரியில், இலங்கை கடற்படையின் முன்னாள் தளபதி அட்மிரல் வசந்த கரன்னகொட, இந்த வழக்கில் 14 ஆவது சந்தேக நபராகப் பெயரிடப்பட்டார். அவர் கடற்படை வீரர்களால் கட்டாயமாக காணாமல் போனது பற்றி அறிந்திருந்தார் என்று குற்றம் சாட்டப்பட்டார்.

இந்நிலையில் 2021 ஆகஸ்ட் 4 அன்று, சட்டமா அதிபர் திணைக்களம் கரன்னகொடவுக்கு எதிரான குற்றச்சாட்டுகளை தொடர வேண்டாம் என்று கொழும்பு மேல் நீதிமன்றின் சிறப்பு ட்ரயல் அட்பார் நீதிமன்றுக்கு அறிவித்தது.