மேல் மாகாண முன்னாள் ஆளுநர் அசாத் சாலி சி.ஐ.டி. எனப்படும் குற்றப் புலனாய்வுத் திணைக்களத்தின் சிறப்புக் குழுவினரால் கைது செய்யப்பட்ட நிலையில், அவர் தொடர்பில் முன்னெடுக்கப்பட்ட ஆரம்ப கட்ட விசாரணையின் அறிக்கை சட்டமா அதிபருக்கு அனுப்பி வைக்கப்பட்டுள்ளதாக அறிய முடிகின்றது.
சி.ஐ.டி.யின் விஷேட விசாரணைப் பிரிவு இலக்கம் 1 இன் பொறுப்பதிகாரி பிரதான பொலிஸ் பரிசோதகர் ஜயந்த பயாகலவின் பொறுப்பில், அசாத் சாலி தடுத்து வைத்து விசாரிக்கப்பட்டு வரும் நிலையிலேயே, இந்த முதல் கட்ட விசாரணை அறிக்கை சட்டமா அதிபருக்கு அனுப்பப்பட்டுள்ளதாக அறிய முடிகின்றது.
அந்த அறிக்கையினை ஆராய்ந்த பின்னர் சட்டமா அதிபர் அளிக்கும் ஆலோசனைகளுக்கு அமைய அடுத்த கட்ட நடவடிக்கை தொடர்பில் சி.ஐ.டி. செயற்படும் என பொலிஸ் தலைமையக தகவல்கள் தெரிவிக்கின்றன.
அசாத் சாலியின் கைது தொடர்பில் பிரதானமாக மாவனெல்லை புத்தர் சிலை தகர்ப்பு விவகாரத்தை கோடிட்டு, அடிப்படைவாதிகளை பாதுகாத்ததாக கூறி கொழும்பு பிரதான நீதிவான் புத்திக ஸ்ரீ ராகல முன்னிலையில் சி.ஐ.டி. பீ அறிக்கை சமர்ப்பித்துள்ள நிலையில், அதனை மையப்படுத்தியே விசாரணைகள் தொடர்கின்றன.
இவ்வாறு அசாத் சாலியை தடுத்து வைத்து விசாரணை செய்வதற்கான அனுமதியை, பாதுகாப்பு அமைச்சர் என்ற ரீதியில் ஜனாதிபதி கோத்தாபய ராஜபக்ஷ, MOD/LEG/PTA/21/2021 எனும் கடிதம் ஊடாக மார்ச் 19ஆம் திகதி வெள்ளிக்கிழமை இரவு வழங்கியுள்ளார்.
அரசியலமைப்பின் 44 (2) ஆம் உறுப்புரையுடன் இணைத்து வாசிக்கப்பட வேண்டிய 1979 ஆம் ஆண்டின் 48 ஆம் இலக்க பயங்கரவாத தடைச் சட்டத்தின் 9 (1) ஆம் பிரிவின் கீழ் இந்த தடுப்புக் காவல் அனுமதி ஜனாதிபதியினால் குற்றப் புலனாய்வுத் திணைக்களத்துக்கு வழங்கப்பட்டுள்ளது.
இதனிடையே, மேல் மாகாண முன்னாள் ஆளுநர் அசாத் சாலியின் கைது மற்றும் தடுத்து வைப்புக்கு எதிராக உயர் நீதிமன்றில் தாக்கல் செய்யப்பட்டுள்ள அடிப்படை உரிமை மீறல் மனு அடுத்த வாரம் பரிசீலனைக்கு எடுத்துக் கொள்ளப்படும் என தெரிகிறது.
அசாத் சாலி சார்பில், தன்னையே மனுதாரராக பெயரிட்டு, சிரேஷ்ட சட்டத்தரணி கெளரி சங்கரி தவராசா இம்மனுவை தாக்கல் செய்திருந்தார்.
Vidivelli
No comments:
Post a Comment