பிரபல மனித உரிமைகள் சட்டத்தரணி ஹிஜாஸ் ஹிஸ்புல்லாஹ் உள்ளிட்ட இருவருக்கு எதிரான வழக்கில், அரச தரப்பின் பிரதான சாட்சியாளர்களான, புத்தளம், அல் சுஹைரியா மத்ரஸா பாடசாலையின் முன்னாள் மாணவர்கள் எனக் கூறப்படும் மொஹம்மட் மலிக், மொஹம்மட் பெளஸான் ஆகியோருக்கு, சட்டத்தரணிகளை சி.ஐ.டி. அதிகாரிகளே ஏற்பாடு செய்து கொடுத்தமை தொடர்பில் அறிந்திருந்தால், ஒருபோதும் அவ்விருவரின் வாக்கு மூலங்களையும் தான் பதிவு செய்திருக்க மாட்டேன் என மேல் நீதிமன்ற நீதிபதி ரங்க திஸாநாயக்க புத்தளம் மேல் நீதிமன்றில் சாட்சியம் அளித்தார்.
16 ஆம் திகதி புத்தளம் மேல் நீதிமன்றில் நடந்த வழக்கு விசாரணைகளின் இடையே, இந்த விடயத்தை பிரதிவாதி தரப்பின் சட்டத்தரணிகளான அசித் சிறிவர்தன மற்றும் சமிந்த அத்துகோரளவின் குறுக்கு விசாரணையின்போது நீதிபதி ரங்க திஸாநாயக்க வெளிப்படுத்தினார்.
உயிர்த்த ஞாயிறு தின தொடர் தற்கொலை தாக்குதல்கள் குறித்த விசாரணைகளுக்காக கைது செய்யப்பட்டு சி.ஐ.டி.யில் தடுத்து வைக்கப்பட்டிருந்த பின்னர் தற்போது சதி செய்தமை, சமூகங்களிடையே வெறுப்புணர்வை தூண்டிய குற்றச்சாட்டுக்களின் கீழ் வழக்குத் தொடரப்பட்டுள்ள சிரேஷ்ட சட்டத்தரணி ஹிஜாஸ் ஹிஸ்புல்லாஹ் மற்றும் சுஹைரியா மத்ரஸா பாடசாலை அதிபர் சலீம் கான் மொஹம்மட் சகீல் ஆகியோருக்கு எதிராக தொடரப்பட்டுள்ள வழக்கு 16 ஆம் திகதி நீதிபதி நதீ அபர்னா சுவந்துருகொட முன்னிலையில் புத்தளம் மேல் நீதிமன்றில் விசாரணைக்கு வந்தது.
இதன்போது, பிணையில் இருக்கும் சட்டத்தரணி ஹிஜாஸ் ஹிஸ்புல்லாஹ் 2 ஆம் பிரதிவாதியான அல் சுஹைரியா மத்ரசா பாடசாலை அதிபர் சகீல் கான் ஆகியோர் மன்றில் ஆஜராகியிருந்தனர்.
முதல் பிரதிவாதியான சட்டத்தரணி ஹிஜாஸ் ஹிஸ்புல்லாஹ் சார்பில், ஜனாதிபதி சட்டத்தரணி பர்மான் காசிம் மற்றும் சிரேஷ்ட சட்டத்தரணி அசித் சிறிவர்தன உள்ளிட்ட குழுவினர் ஆஜராகினர்.
2 ஆம் பிரதிவாதியான அதிபர் சகீல்கான் சார்பில் சிரேஷ்ட சட்டத்தரணி சமிந்த அத்துகோரள தலைமையில் ஹபீல் பாரிஸ் உள்ளிட்ட குழுவினர் ஆஜராகினர்
வழக்குத் தொடுநர் சட்டமா அதிபர் சார்பில் பிரதி சொலிசிட்டர் ஜெனரால் லக்மினி கிரிஹாகமவும் சிரேஷ்ட பிரதி சொலிசிட்டர் ஜெனரால் சுதர்ஷன சில்வாவும் ஆஜராகினர்.
அத்துடன் இவ்வழக்கு விசாரணைகளை கண்காணிக்க ஐரோப்பிய ஒன்றிய அதிகாரிகள், அமரிக்க தூதரக அதிகாரிகள் நீதிமன்றில் பிரசன்னமாகியிருந்தமை விஷேட அம்சமாகும். இதனைவிட இந்த வழக்குத் தவணையின்போது, சட்டத்தரணி ஹிஜாஸ் ஹிஸ்புல்லாஹ்வுக்கு ஆதரவு தெரிவித்து, வழக்கை கண்காணிக்க கத்தோலிக்க மத குருமார், அருட் தந்தைமார் மற்றும் அருட் சகோதரிகள் என பலரும் மன்றில் ஆஜராகியிருந்தனர்.
கடந்த 2018 ஆம் ஆண்டு ஆகஸ்ட் முதலாம் திகதிக்கும் 31 ஆம் திகதிக்கும் இடைப்பட்ட காலப்பகுதியில் புத்தளம் அல் சுஹைரியா மத்ரஸா பாடசாலையில் கல்வி பயின்ற மாணவர்களுக்கு, கற்றுக் கொடுக்கப்பட்ட சொற்கள் ஊடாகவோ, தவறான பிரதி நிதித்துவம் ஊடாகவோ பல்வேறு மதங்களுக்கு இடையில் மோதல் ஏற்படும் வண்ணம் எதிர் உணர்வுகளை தூண்டும் விதமாக சொற் பொழிவினை நடாத்தியமை, அதற்காக சதி செய்தமை தொடர்பில் பயங்கரவாத தடை சட்டத்தின் 2 (1) எச் பிரிவுடன் இணைத்து கூறப்படும் அச்சட்டத்தின் 3 (அ) பிரிவின் கீழ் தண்டனைக் குறிய குற்றம் ஒன்றினை புரிந்துள்ளதாக ஹிஜாஸ் ஹிஸ்புல்லாஹ் மீது குற்றம் சுமத்தப்பட்டுள்ளது.
அத்துடன் ஹிஜாஸ் ஹிஸ்புல்லாஹ் தொடர்பில், ‘ இஸ்ரேலியர்கள் கைப்பற்றியிருப்பது, எமது பள்ளிவாசல்கள். இலங்கையில் கத்தோலிக்கர்களுக்கு எதிராக தாக்குதல் நடத்தினாலேயே அவர்கள் அச்சப்படுவர்.’ என கூறி இஸ்ரேல் – பலஸ்தீன் யுத்த வீடியோக்களை காண்பித்தமை ஊடாக மதக் குழுக்கள் இடையே மோதல் நிலைமையை ஏற்படுத்தும் வண்ணம் உணர்வுகளை தூண்டியதாக பயங்கரவாத தடை சட்டத்தின் 2 (1) எச் பிரிவுடன் இணைத்து நோக்கப்படும் அச்சட்டத்தின் 2 (2) 11 பிரிவின் கீழ் தண்டனைக்குரிய குற்றம் ஒன்றினை புரிந்துள்ளதாக குற்றம் சுமத்தப்பட்டுள்ளது.
குறித்த இரு குற்றச்சாட்டுக்கள் தொடர்பிலும் உதவி ஒத்தாசை புரிந்ததாக சுஹைரியா மத்ரஸா பாடசாலை அதிபர் சலீம் கான் மொஹம்மட் சகீல் மீது பயங்கரவாத தடை சட்ட ஏற்பாடுகள் பிரகாரம் குற்றம் சுமத்தப்பட்டுள்ளது.
இதனைவிட, பலஸ்தீன் - இஸ்ரேல் தொடர்பிலான யுத்த வீடியோ காட்சிகளை காண்பித்து ஹிஜாஸ் ஹிஸ்புல்லாஹ் கூறியதாக கூறப்படும் வசனங்கள் ஊடாக வெறுப்புணர்வுகளை விதைத்தாக குற்றம் சுமத்தி சிவில் அரசியல் உரிமைகள் குறித்தான சர்வதேச இணைக்கப்பாட்டு சட்டத்தின் 3 (1) ஆம் உறுப்புரையுடன் இணைத்து பார்க்கப்படும் அச்சட்டத்தின் 3 (3) ஆம் உறுப்புரையின் கீழ் குற்றம் ஒன்றினை புரிந்துள்ளதாக ஹிஜாஸ் ஹிஸ்புல்லாஹ்வுக்கு எதிராகவும், அதற்கு உதவி ஒத்தாசை புரிந்தமை தொடர்பில் மத்ரஸா அதிபர் சலீம் கான் மொஹம்மட் சகீலுக்கு எதிராகவும் குற்றம் சுமத்தப்பட்டுள்ளது.
இந் நிலையில், அரச தரப்பின் பிரதான சாட்சியாளர்களான மலிக் மற்றும் பெளஸான் ஆகியோர் கோட்டை நீதிவானுக்கு கடந்த 2020 மே 12 ஆம் திகதி பீ 13101/19 எனும் வழக்குக் கோவையின் கீழ் குற்றவியல் நடைமுறை சட்டக் கோவையின் 127 ஆம் அத்தியாயம் பிரகாரம் வழங்கிய இரகசிய வாக்கு மூலத்தின் சுயாதீனத் தன்மை தொடர்பில் தெளிவுபடுத்துவதற்கான சாட்சி விசாரணைகள் ஆரம்பிக்கப்பட்டன.
அதன்படி அப்போது கோட்டை நீதிவானாக இருந்த தற்போதைய பலபிட்டிய மேல் நீதிமன்ற நீதிபதி ரங்க திஸாநாயக்க சாட்சியம் வழங்க அழைக்கப்பட்ட நிலையில், சிரேஷ்ட பிரதி சொலிசிட்டர் ஜெனரால் சுதர்ஷன சில்வாவின் நெறிப்படுத்தலில் அவர் சாட்சியமளித்தார்.
சி.ஐ.டி.யின் விஷேட விசாரணைப் பிரிவு இல. 3 இன் பொறுப்பதிகாரி பிரதான பெண் பொலிஸ் பரிசோதகர் தீபானி மெனிகே நீதிமன்றில் நகர்த்தல் பத்திரம் ஊடாக முன் வைத்த கோரிக்கைக்கு அமைய குறித்த இரு சாட்சியாளர்களின் வாக்கு மூலம் பதிவு செய்யப்பட்டதாக நீதிபதி ரங்க திஸாநாயக்க இதன்போது கூறினார்.
‘சாட்சியம் எனது உத்தியோகபூர்வ அறையில் பதிவு செய்யப்பட்டது. முதலில் மலிக் எனும் சாட்சியாளரின் சாட்சியம் பதிவு செய்யப்பட்டது. அவருக்கு சிங்களம் நன்றாக தெரியும். அதனையும் நான் பதிவிட்டேன். எனவே அவருக்கு மொழிபெயர்ப்பாளர் அவசியம் ஏற்படவில்லை. வாக்கு மூலம் பெறும் போது அதனை தட்டச்சு செய்தவர் தவிர மூன்றாம் நபர் இருக்கவில்லை.
ஆனால் விஷேட நிலைமை ஒன்று இருந்தது. அதாவது சாட்சியாளர்கள் இருவரும் 18 வயதுக்கும் குறைவானவர்கள் என்பதால் அவர்களின் சட்டத்தரணிகள் உடனிருக்க அனுமதிக்கப்பட்டார்கள். அதற்கான அனுமதியை நான் வழங்கினேன்.
பெளசான் எனும் சாட்சியாளருக்கு சிங்களம் தெரியாததால் மொழி பெயர்ப்பாளர் ஒருவரின் உதவியும் பெறப்பட்டது.
இதன்போது மனோகர டி சில்வா, துஷிகா நாமலி சில்வா ஆகிய சட்டத்தரணிகளே உடனிருந்தனர்.’ என நீதிபதி ரங்க திஸாநாயக்க சாட்சியமளித்தார்.
இதனையடுத்து அவரிடம் குறுக்கு விசாரணை செய்யப்பட்டது. முதலில் சிரேஷ்ட சட்டத்தரணி அசித் சிறிவர்தன குறுக்கு விசாரணை செய்தார்.
முதலில் குறித்த வாக்கு மூலங்கள் சுயாதீனமாக வழங்கப்படுகின்றது என்பதை உறுதி செய்ய எடுக்கப்பட்ட நடவடிக்கை தொடர்பில் அவர் கேள்வி எழுப்பினார்.
இதற்கு பதிலளித்த நீதிபதி ரங்க திசாநாயக்க ‘ குற்றவியல் நடைமுறை சட்டக் கோவையின் 127 ஆம் அத்தியாயம் பிரகாரம் இரு வகையான வாக்கு மூலங்களை நாம் பதிவு செய்வோம். ஒன்று, குற்றம் செய்ததாக சந்த்தேக நபர் ஒருவர் வழங்கும் ஒப்புதல் வாக்கு மூலம். மற்றையது விடயம் ஒன்றினை அறிந்த சந்தேக நபர் அல்லாத ஒருவர் வழங்கும் வாக்கு மூலம். ஒப்புதல் வாக்கு மூலம் ஒன்றினை பதிவு செய்யும் போது பின்பற்றும் மிகக் கவனமான நடைமுறைகளை சந்தேக நபர் அல்லாத ஒருவர் வழங்கும் சாதாரண வாக்கு மூலம் ஒன்றினை பதிவு செய்யும் போது பின்பற்ற மாட்டோம்‘ என தெரிவித்தார்.
இதன்போது குறித்த இரு சாட்சியாளர்களும் இரகசிய வாக்கு மூலம் அளித்த போது, அவர்களுக்காக ஆஜரான சட்டத்தரணிகள் இருவரும் அவர்களுக்கு சி.ஐ.டி.யினரால் ஏற்பாடு செய்து கொடுக்கப்பட்டவர்கள் என தெரியுமா? என குறுக்கு விசாரணை செய்யப்பட்டது.
அதற்கு பதிலளித்த நீதிபதி ரங்க திஸாநாயக்க, சி.ஐ.டி.யினர் ஏற்பாடு செய்து கொடுத்ததாக தெரியாது. சாதாரணமாக ஒருவருக்காக சட்டத்தரணி ஒருவர் ஆஜராகும் போது, அவர்களே சட்டத்தரணியின் சேவையை பெற்றுக்கொண்டுள்ளதாகவே நாம் நம்புவோம். உண்மையில் சி.ஐ.டி.யினரே சட்டத்தரணிகளை ஏற்பாடு செய்துகொடுத்திருந்தமையை நான் அறிந்திருந்தால், அவர்கள் இருவரின் வாக்கு மூலங்களை நான் பதிவு செய்திருக்கவே மாட்டேன்.
உண்மையில் இந்த வாக்கு மூலங்களை நீதிவான் பதிவு செய்ய வேண்டிய அவசியம் இல்லை. அதனை சி.ஐ.டி.யினரே செய்திருக்கலாம். ‘ என தெரிவித்தார்.
இதனைத் தொடர்ந்து குறித்த இரகசிய வாக்கு மூலங்கள் வழங்கப்பட்ட பின்னர், அதில் கூறப்பட்டுள்ளதாகத் தெரிவித்து ஊடகங்களில் வெளியான செய்திகள் தொடர்பில் கொழும்பு குற்றத் தடுப்புப் பிரிவுக்கு விசாரணைகளை செய்ய உத்தரவிட்டதாகவும், அவ்விசாரணைகளில் திருப்தியான அறிக்கை எதுவும் கிடைக்கவில்லை எனவும் நீதிபதி ரங்க திசாநாயக்க குறிப்பிட்டார்.
இந்நிலையில் இவ்வழக்கு மேலதிக சாட்சி விசாரணைகளுக்காக எதிர்வரும் மார்ச் முதலாம் திகதிக்கு ஒத்தி வைக்கப்பட்டது. குறித்த திகதியில் வழக்கின் 24,31,38 ஆம் இலக்க சாட்சியாளர்களுக்கு மன்றில் ஆஜராக உத்தரவிடப்பட்டது.
Vidivelli
No comments:
Post a Comment