இரண்டு மாதமாக கடலுக்கு சென்றவர்கள் வீடு திரும்பவில்லை : அந்தமான் தீவில் கண்டுபிடிக்கப்பட்டவர்கள் எங்கே? : தேடியலையும் உறவினர்கள் மீட்டுத் தருமாறு கோரிக்கை - News View

About Us

About Us

Breaking

Thursday, November 25, 2021

இரண்டு மாதமாக கடலுக்கு சென்றவர்கள் வீடு திரும்பவில்லை : அந்தமான் தீவில் கண்டுபிடிக்கப்பட்டவர்கள் எங்கே? : தேடியலையும் உறவினர்கள் மீட்டுத் தருமாறு கோரிக்கை

எஸ்.எம்.எம்.முர்ஷித்

வாழைச்சேனையிலிருந்து செப்டெம்பர் மாதம் 26ம் திகதி ஆழ்கடலுக்கு மீன்பிடிக்கச் சென்ற படகு இரண்டு மாதமாகியும் கடலுக்குச் சென்றவர்கள் திரும்பவில்லை என்றும், இவர்களை மீட்டுத்தருமாறும் மீனவர்களின் உறவினர்கள் தெரிவித்தனர்.

கடந்த செப்டெம்பர் மாதம் 26ம் திகதி வாழைச்சேனை துறைமுகத்திலிருந்து புறப்பட்டுச் சென்ற படகு வியாழக்கிழமை  வரைக்கும் கரைக்கு வரவில்லை என்றும், அவர்கள் தொடர்பான திருப்திகரமான பதில் எதுவும் கிடைக்கவில்லை என்ற ஆதங்கத்தில் கடலுக்குச் சென்ற மீனவர்களின் உறவினர்கள் ஓட்டமாவடி பாலைநகர் கிராமத்தில் இடம்பெற்ற ஊடகவியலாளர் சந்திப்பில் தெரிவித்தனர்.

வாழைச்சேனை மீன்பிடித் துறைமுறைகத்திற்கு கடந்த மாதம் வருகை தந்த கடற்றொழில் அமைச்சர் டக்ளஸ் தேவானந்தா கடலுக்குச் சென்றவர்கள் அந்தமான் தீவில் கண்டு பிடிக்கப்பட்டதாகவும், அவர்களை மிக விரைவில் மீட்டுத்தருவதாகவும் உறவினர்களிடம் உறுதியளித்துச் சென்றார்.

இன்றுவரை (25.11.2021) குறித்த நபர்கள் வரவில்லை என்றும், எங்களுக்கு கடற்றொழில் அமைச்சர், கடற்றொழில் திணைக்களம், பிரதேச மீனவ சங்கங்கள் உரிய நடவடிக்கை தொடர்பில் கவனஞ்செலுத்தி தீர்வீனைப் பெற்றுத்தருவதில் அசமந்தப்போக்காக உள்ளதாகவும் மீனவர்களின் உறவினர்கள் கவலை தெரிவிக்கின்றனர்.

குறித்த மீனவர்கள் அந்தமான்தீவில் உள்ளமை தொடர்பில் எங்களது தொலைபேசிக்கு புகைப்படங்கள் அனுப்பப்பட்டதுடன், தொலைபேசி அழைப்பு வந்த நிலையில், எங்களோடு அந்தமான்தீவில் உங்களது குடும்ப உறவினர்கள் உள்ளதாகவும் அவர்களைக்கண்ட பாதுகாப்புத் தரப்பினர் தெரிவித்த நிலையில், மீண்டும் அந்த அழைப்பைத் தொடர்பு கொள்ள முயற்சித்த போது அழைப்பை ஏற்படுத்த முடியவில்லை. எமது உறவினர்கள் அவர்களிடமுள்ள நிலையில் அவர்களுக்கு எங்களது தொடர்பு இலக்கம் வழங்கப்பட்டு எங்களோடு தொடர்பு கொண்டார்கள்.
அந்தமான்லிருந்து 00913192245530 மற்றும் 0115299623 என்ற இலக்கத்தின் மூலம் தொலைபேசி அழைப்பு வந்த தங்களது உறவினர்கள் தொடர்பில் பெயர் குறிப்பிட்டு விசாரணை செய்தனர். இதன் பின்னர் தொடர்பில்லாமல் உள்ளமைக்கான காரணம் என்னவென்று இன்னும் தெரியவில்லை என மீனவர்களின் உறவினர்கள் தெரிவிக்கின்றனர்.

அந்தமான்தீவில் கண்டுபிடிக்கப்பட்ட மீனவர்கள் தற்போது எங்கே? அந்தமான்தீவு கடற்பாதுகாப்புப் பிரிவினரிடம் ஒப்படைக்கப்பட்ட எமது உறவினர்கள் அங்கிருந்து படகுடன் எங்கு கொண்டு செல்லப்பட்டனர்.

இது தொடர்பில் மீனவர்கள் எங்கு உள்ளனர் என்றும், பிறகு மீனவர்களின் தகவல் கிடைக்கவில்லை என்றும் அரசாங்கம் எங்களை ஏமாற்றுகின்றதா? அல்லது கடற்றொழில் அமைச்சர் டக்ளஸ் தேவானந்தா இது தொடர்பில் கரிசனை கொள்ளாமல் உள்ளாரா? என்று பாதிக்கப்பட்ட மீனவர்களின் உறவினர்கள் கவலை தெரிவிக்கின்றனர்.

நான்கு மீனவர்களை நம்பி வாழும் நான்கு குடும்பம் தற்போது பாரிய கஷ்டத்திற்கு மத்தியில் வாழ்ந்து வருகின்றது. இரண்டு மாதங்களாக மற்றவர்களது உதவி மற்றும் கடன் வாங்கி தங்களது வாழ்க்கைச் செலவினை நடாத்தி வருவதாகவும், அத்தோடு, காணாமல் போனவர்களது குழந்தைகள் தனது தந்தையைக் கேட்டு அழுதவாறு உள்ளதாகவும் அயலவர்கள் தூக்கிச்சென்று ஆறுதல் கூறுவதாகவும் பாதிக்கப்பட்டவர்கள் தெரிவிக்கின்றனர்.

எனவே, கடற்றொழில் அமைச்சர், கடற்றொழில் திணைக்களம், பிரதேச மீனவ சங்கங்கள் உரிய நடவடிக்கை மேற்கொண்டு இரண்டு மாதமான நிலையில் எங்களது உறவினர்களை உடனடியாக கண்டு பிடித்துத் தருமாறு அன்பாகக் கேட்டுக் கொள்வதோடு, உங்களது கதைகளை நம்பியே நாங்கள் இரண்டு மாதமாக எங்களது உறவுகள் மீண்டும் வருவார்கள் என்று காத்துக் கொண்டிருக்கின்றோம் என்று பாதிக்கப்பட்ட மீனவர்களின் உறவினர்கள் கோரிக்கை விடுக்கின்றனர்.

நான்கு மீனவர் சென்ற குறித்த படகு நீல நிறம் என்றும் அதன் இலக்கம் IMULA 0093 Tle என்று தெரிவிக்கப்பட்டுள்ளதுடன், இதில் வாழைச்சேனையைச் சேர்ந்த எம்.வி.ரிஸ்கான் (வயது 21), ஐந்து பிள்ளைகளின் தந்தையான எம்.எச்.முஹம்மட் கலீல் (வயது 49), ஏ.எம்.றியாழ் (வயது 19), மூன்று பிள்ளைகளின் தந்தையான கே.எம்.ஹைதர் (வயது 41) ஆகியோர் சென்ற நிலையில் இன்று வரை கரை திரும்பவில்லை என்பது குறிப்பிடத்தக்கது.

No comments:

Post a Comment