தேசியம் தேசியம் என்று பேசிக்கொண்டு மக்களை இன்னமும் ஏமாற்றிக் கொண்டிருப்பதை தமிழ் மக்கள் உணர்ந்து கொண்டு தமிழர் ஐக்கிய சுதந்திர முன்னணியின் பின்னால் அணி திரள வேண்டும்

தேசியம் தேசியம் என்று பேசிக்கொண்டு மக்களை இன்னமும் ஏமாற்றிக் கொண்டிருப்பதை தமிழ் மக்கள் உணர்ந்து கொண்டு தமிழர் ஐக்கிய சுதந்திர முன்னணியின் பின்னால் அணி திரள வேண்டும் என முன்னாள் பிரதி அமைச்சர் விநாயகமூர்த்தி முரளிதரன் தெரிவித்தார். 

பாராளுமன்றத் தேர்தலில் முன்னாள் பிரதி அமைச்சர் விநாயகமூர்த்தி முரளிதரன் தலைமையிலான தமிழர் ஐக்கிய சுதந்திர முன்னணி கட்சியில் மட்டக்களப்பு மாவட்டத்தில் விஜயவதி முரளிதரன், முன்னாள் நாடாளுமன்ற உறுப்பினர் சே.ஜெயானந்தமூர்த்தியும், அம்பாறையில் நானும் மற்றும் வடக்கில் வன்னித் தேர்தல் மாவட்டத்தில் கட்சி போட்டியிடப் போவதாக முன்னாள் பிரதி அமைச்சர் விநாயகமூர்த்தி முரளிதரன் தெரிவித்தர். 

கருணா அம்மானின் கட்சியான தமிழர் ஐக்கிய சுதந்திர முன்னணி கட்சியின் மத்திய குழுக் கூட்டம் மட்டக்களப்பு நொச்சிமுனையிலுள்ள ஹோட்டல் ஒன்றில் நேற்று ஞாயிற்றுக்கிழமை இடம்பெற்றது. இதன் போது எடுக்கப்பட்ட தீர்மானங்களை அறிவிக்கும் ஊடகவியலாளர் மாநாட்டில் அவர் இவ்வாறு தெரிவித்தார். 

பாராளுமன்றத் தேர்தலில் தமிழர் ஐக்கிய சுதந்திர முன்னணி கிழக்கு மாகாணம் மற்றும் வடக்கில் வன்னித் தேர்தல் மாவட்டத்தில் களமிறங்கத் தீர்மானித்துள்ளது. கிழக்கு மாகாணத்தில் அனைவரும் ஒன்றிணைந்து தேர்தலை எதிர்கொள்வதற்கான பேச்சுவார்த்தைகள் தற்போது இடம்பெற்றுக் கொண்டிருக்கின்றன. 

தேசியக் கட்சிகளுடனும் பேச்சுவார்த்தைகள் இடம்பெறுகின்றன. குறிப்பாக பொதுஜன பெரமுன கட்சி அதனுடன் இணைந்து தேர்தலில் களமிறங்க எம்மிடம் கேட்டுள்ளது. கிழக்கு மாகாணத்தைப் பொறுத்த வரையில் முஸ்லீம் வேட்பாளர் எவரையும் நியமிக்காவிட்டால் அக்கட்சியுடன் இணைந்து தேர்தலில் ஈடுபட முடியும் என ஆணித்தரமாகத் தெரிவித்துள்ளோம். 

எதிர்வரும் நாட்களில் எமது மத்திய குழு மீண்டும் கூடும். அதிலேதான் எமது இறுதி முடிவினை அறிவிப்போம். தற்போதைக்கு எமது கட்சியின் மட்டக்களப்பு மாவட்டத்துக்குரிய பிரதான வேட்பாளர்களாக முன்னாள் பாராளுமன்ற உறுப்பினர் சே.ஜெயானந்தமூர்த்தி மற்றும் விஜயவதி முரளிதரன் ஆகியோர் எமது மத்திய குழுவினால் தெரிவு செய்யப்பட்டிக்கின்றார்கள். 

அம்பாறை மாவட்டத்தில் வேட்பாளர் தெரிவுகள் மேற்கொள்ளப்படவில்லை. நான் அங்கு போட்டியிடுவதற்குத் தீர்மானித்துள்ளேன். திருகோணமலை மாவட்டத்திலும் வேட்பாளர் தெரிவு விடயங்கள் மேறகொள்ளப்பட்டு வருகின்றன. வன்னி மாவட்டத்தில் முன்னாள் போராளிகள் மற்றும் அவர்களின் உறவுகள் என்ற ரீதியில் எமது வேட்பாளர் தெரிவுகள் இடம்பெறும். எமது தெரிவுகள் ஒவ்வொன்றும் போராளிகளை அல்லது போராளிகள் குடும்பங்களை மையப்படுத்தியதாக இருக்கும். 

இன்று தமிழ்த் தேசியம் பேசும் கட்சிகள் போராளிகளைப் புறந்தள்ளி இருக்கின்றார்கள். அவர்கள் ஒரு போராளியைக் கூட வேட்புமனுவில் உள்வாங்குவதற்கு முயற்சியெடுக்கவில்லை. எனவே எமது போராளிகளின் துன்ப துயரங்களை நீக்குவதற்காக அவர்கள் மத்தியில் இருந்து வேட்பாளர்களைத் தேர்ந்தெடுப்பதே எமது நோக்கம். 

கிழக்கு மாகாணத்திலே பிரிவுகள் எற்படுவதற்கு நாங்கள் விரும்பவில்லை. நாங்கள் பிரிந்து நின்றால் அது வேறு சக்திகளுக்குத் தான் வாய்ப்பாக அமையும். எனவே ஒற்றுமைக்காகப் பல விட்டுக் கொடுப்புகளை மேற்கொள்ளவும் நாங்கள் தயராக இருக்கின்றோம். 

அந்த அடிப்டையில்தான் ஆனந்த சங்கரியுடன் பல பேச்சுவார்த்கைளை நடத்தினோம். ஆனால் எவ்வித ஒப்பந்தங்களையும் மேற்கொள்ளவில்லை. ஆனந்த சங்கரியின் கருத்துக்கள், செயற்பாடுகளின் காரணாக அதனை தொடர்ந்து மேற்கொள்ள முடியவில்லை. அவர் சில விட்டுக் கொடுப்புகளுடன் முன்வந்தால் அவருடன் இணைந்து போவதற்கு நாங்கள் தயாராக இருக்கின்றோம். 

தமிழ்த் தேசியக் கூட்டமைப்பு மக்களுக்கு எதுவித சேவையும் செய்யவில்லை, எந்த உரிமையையும் காப்பாற்றவில்லை. மாறாக நிலங்களை நாங்கள் பறிகொடுத்துள்ளோம். அதற்காக அவர்கள் குரல் கொடுக்கவும் இல்லை. எல்லைப்புற மக்களை அவர்கள் கணக்கில் எடுப்பதும் இல்லை. மட்டக்களப்பு மாவட்டத்தைப் பொருத்தவரையில் எதுவித பிரயோசனமும் இல்லாத கட்சியாக தமிழ்த் தேசியக் கூட்டமைப்பு மக்களால் பார்க்கப்படுகின்றது. 

தற்போது வேட்பாளர் தெரிவில் கூட பல தேச துரோகங்களைச் செய்தவர்களையெல்லாம் தங்கள் கட்சியில் நிறுத்தியிருக்கின்றார்கள். இதை தமிழ் மக்கள் ஏற்றுக் கொள்ளமாட்டார்கள். 

பட்டிருப்பு தொகுதில் ஒருவரை நியமிப்பதாக கூறியிருக்கின்றனர் அவர் ஆரம்பத்திலே ஸ்ரீலங்கா சுதந்திரக் கட்சியிலும் பின்னர் ஜக்கிய தேசிய கட்சியிலும் பின்னர் மொட்டு கட்சியுடன் இணைந்து செயற்படுவதாக விருப்பம் தெரிவித்தார். தற்போது தமிழ் தேசிய கூட்டமைப்பில் வேட்பாளராக களமிறங்க தயாராக இருக்கின்றார். இவ்வாறானவர்கள் எவ்வாறு தமிழ்த் தேசியம் பேச முடியும். அந்தளவிற்கு வேட்பாளர் பற்றாக்குறை நிலவுகின்ற ஒரு கட்சியாகத் தமிழ்த் தேசியக் கூட்டமைப்பு மாற்றமடைந்திருக்கின்றது. 

எனவே தேசியம் தேசியம் என்று பேசிக்கொண்டு மக்களை இன்னமும் ஏமாற்றிக் கொண்டிருப்பதை தமிழ் மக்கள் உணர்ந்து கொண்டு தமிழர் ஐக்கிய சுதந்திர முன்னணியின் பின்னால் அணி திரள வேண்டும் என்று தெரிவித்தார்.