தென்னகோனை பதவி நீக்கம் செய்யும் பிரேரணை புத்தகத்தில் சேர்ப்பு : எம்பிக்கள் அனைவரையும் கொழும்பில் தங்கியிருக்குமாறு அறிவிப்பு

பதவியிலிருந்து இடைநிறுத்தப்பட்ட பொலிஸ்மா அதிபர் தேசபந்து தென்னகோனை பதவி நீக்கம் செய்யும் பிரேரணை மீதான விவாதம் நாளைமறுதினம் செவ்வாய்க்கிழமை (05) நடைபெறவுள்ளது.

பிரேரணை மீதான விவாதம் மீதான வாக்கெடுப்பு அன்றையதினம் பிற்பகல் நடைபெறும் என தெரிவிக்கப்பட்டுள்ளது.

இந்நிலையில், ஆளும் கட்சி பாராளுமன்ற உறுப்பினர்கள் அனைவரும் கொழும்பில் தங்கியிருக்குமாறு அறிவித்தல் விடுக்கப்பட்டுள்ளது.

தேசபந்து தென்னகோனை பதவி நீக்கம் செய்யும் பிரேரணை மீதான விவாதத்தின்போது, பாராளுமன்றத்தைச் சுற்றியுள்ள பகுதிகளிலும் பாதுகாப்பை பலப்படுத்தவும் நடவடிக்கை மேற்கொள்ளப்பட்டுள்ளமை குறிப்பிடத்தக்கது.

நிலையியற் கட்டளைகளின்படி, இந்தப் பிரேரணையை நிறைவேற்றப்படுவதற்கு, மொத்த பாராளுமன்ற உறுப்பினர்களில் 113 பேர் பிரேரணைக்கு ஆதரவாக வாக்களிக்க வேண்டும்.

குறித்த பிரேரணை நிறைவேற்றப்படும் பட்சத்தில் சபாநாயகர் ஜனாதிபதிக்கு அது குறித்து அறிவிப்பார். இதனைத் தொடர்ந்து, ஜனாதிபதி அரசியலமைப்பு பேரவைக்கு புதிய பொலிஸ்மா அதிபர் பதவிக்கான பரிந்துரையை மேற்கொள்வார்.

நாட்டில் ஒரு பொலிஸ்மா அதிபர் பாராளுமன்ற தீர்மானத்தால் பதவி நீக்கம் செய்யப்படுவது இதுவே முதல் முறை.

தேசபந்து தென்னகோனுக்கு எதிரான தவறான நடத்தை குற்றச்சாட்டுகளை விசாரித்த மூன்று பேர் கொண்ட பாராளுமன்றக் குழு, அனைத்து குற்றச்சாட்டுகளுக்கும் அவர் குற்றவாளி என அறிவித்து, அவரை சேவையிலிருந்து நீக்க பரிந்துரைத்துள்ளமை குறிப்பிடத்தக்கது.

தேசபந்து தென்னகோனை பதவி நீக்கம் செய்யும் பிரேரணை புத்தகத்தில் உள்ளடக்கப்பட்டுள்ளது.

ஐந்து முழு நாட்களுக்கு ஒழுங்குப் புத்தகத்தில் இந்தப் பிரேரணை வைக்கப்பட்ட பின்னர் எந்த நாளிலும் அதைப்பற்றி விவாதிக்கலாம் என பாராளுமன்ற நிலையியற் கட்டளைகளில் குறிப்பிடப்பட்டுள்ளது.

தேசிய மக்கள் சக்தி, ஐக்கிய மக்கள் சக்தி மற்றும் தமிழ் தேசியக் கூட்டமைப்பு ஆகியன தேசபந்து தென்னகோனை பதவி நீக்கம் செய்யும் பிரேரணைக்கு ஆதரவாக வாக்களிக்க தீர்மானித்துள்ளமை குறிப்பிடத்தக்கது.