திருகோணமலையில் விகாரை நிர்மாணப் பணிக்கான அனுமதி மறுப்பு : ஆர்ப்பாட்டத்தில் ஈடுபட்ட பிக்குகளுக்கு விளக்கமளித்த ஆளுநர்

திருகோணமலை - நிலாவெளி பெரிய குளம் பகுதியில் விகாரை நிர்மாணிப்பதால் ஏற்படும் பிரச்சினை காரணமாக நிர்மானப் பணிக்காக கோரப்பட்ட அனுமதி மறுக்கப்பட்டுள்ளது.

திருகோணமலை - நிலாவெளி, பெரிய குளம் பகுதியில் நிர்மாணிக்கப்படவிருந்த விகாரையின் நிர்மாணப் பணிகளை ஆரம்பிக்க அனுமதி வழங்குமாறு கோரி மாவட்டச் செயலகத்திற்கு முன்பாக பிக்குகள் இன்று 28 ஆம் திகதி திங்கட்கிழமை ஆர்ப்பாட்டத்தில் ஈடுபட்டு வந்தனர்.

குறித்த விகாரை நிர்மாணிப்பதால் காணப்படும் பிரச்சினை குறித்து ஆர்ப்பாட்டத்தில் ஈடுபட்ட பிக்குகளுக்கு அரச அதிபர் அலுவலகத்தில் வைத்து ஆளுநரால் விளக்கம் அளிக்கப்பட்டு அனுமதி மறுக்கப்பட்டுள்ளது.

இது குறித்து கிழக்கு மாகாண ஆளுநர் செந்தில் தொண்டமான் ஊடகங்களுக்கு கருத்து தெரிவிக்கையில், “திருகோணமலை அனைத்து இன மக்களும் வாழும் ஒரு பிரதேசமாகும்.

பிக்குகளின் செயற்பாடுகள்போல் ஏனைய இனத்தவரும் இவ்வாறானதொரு செயற்பாடுகளை முன்னெடுப்பார்களானால் அதற்கு நீங்களே ஒரு முன்னுதாரணமாக செயற்படுவீர்கள்.

பிரதேச செயலாளரால் வழங்கப்பட்ட கடிதத்தை மீளப் பெற்றாலும், பிரதேச சபையின் அனுமதியின்றி எந்த ஒரு கட்டுமானப் பணிகளும் முன்னெடுக்க முடியாது” என்று தெரிவித்துள்ளார்.

இந்நிலையில், பிரதேச செயலகத்தில், திருகோணமலை மாவட்ட ஒருங்கிணைப்பு குழுக் கூட்டம் இன்று திங்கட்கிழமை (28) இடம்பெற்றுக் கொண்டிருந்த நிலையில், ஆர்ப்பாட்ட காரர்களால் இக்கூட்டம் இடைநிறுத்தப்பட்டமை குறிப்பிடத்தக்கது.