பண வீக்கம் கடந்த பெப்ரவரியில் வீழ்ச்சி

(நா.தனுஜா)

கொழும்பு நுகர்வோர் விலைச்சுட்டெண் மதிப்பீட்டின் பிரகாரம் கடந்த ஜனவரி மாதம் 51.7 சதவீதமாகப் பதிவாகியிருந்த பண வீக்கம் கடந்த பெப்ரவரி மாதம் 50.6 சதவீதமாக வீழ்ச்சியடைந்திருக்கின்றது.

அதன்படி கடந்த ஜனவரியில் 60 சதவீதமாகப் பதிவான உணவுப் பெப்ரவரியில் 54.4 சதவீதமாக வீழ்ச்சியடைந்ததுடன், ஜனவரி மாதம் 47.9 சதவீதமாகப் பதிவான உணவல்லாப் பண வீக்கம் பெப்ரவரி மாதம் 48.8 சதவீதமாக உயர்வடைந்திருக்கின்றது.

மேலும் கொழும்பு நுகர்வோர் விலைச்சுட்டெணின் மாதாந்த மாற்றம் கடந்த ஜனவரி மாதம் 0.47 சதவீதமாகக் காணப்படுவதுடன் இதற்கு உணவல்லாப் பொருட்களின் விலைகளில் 1.20 சதவீதமாக அவதானிக்கப்பட்ட அதிகரிப்புக்கள் காரணமாக அமைந்தன.

அதேவேளை பொருளாதாரத்தின் அடிப்படைப் பண வீக்கத்தைப் பிரதிபலிக்கின்ற மையப்பண வீக்கம் கடந்த ஜனவரியில் 45.6 சதவீதத்திலிருந்து பெப்ரவரி மாதம் 43.6 சதவீதமாக வீழ்ச்சியடைந்துள்ளது.

இந்நிலையில் அண்மைய காலங்களில் பின்பற்றப்பட்டு வரும் இறுக்கமான நாணய மற்றும் இறைக் கொள்கையின் விளைவாக வீழ்ச்சியடைந்துள்ள பண வீக்கமானது இவ்வாண்டு முழுவதும் தொடருமென எதிர்பார்க்கப்படுவதாக மத்திய வங்கி தெரிவித்துள்ளமை குறிப்பிடத்தக்கது.