மண்ணெண்ணெய் விலை குறைப்பு : ஏனைய எரிபொருட்களின் விலைகளில் மாற்றமில்லை

றிஸ்வான் சேகு முஹைதீன் 

இன்று நள்ளிரவு (02) முதல் அமுலுக்கு வரும் வகையில், மண்ணெண்ணெய் விலை ரூ. 50 இனால் குறைக்கப்படுவதாக, இலங்கை பெற்றோலிய கூட்டுத்தாபனம் அறிவித்துள்ளது.

குறித்த விலைக் குறைப்புக்கு அமைய, மண்ணெண்ணெயின் புதிய விலை ரூ. 305 ஆக குறைக்கப்பட்டுள்ளது.

இதேவேளை, தொழிற்துறை மண்ணெண்ணெய் விலை ரூ. 134 இனால் குறைக்கப்பட்டு, ரூ. 330 ஆக குறைக்கப்பட்டுள்ளது.

அதற்கமைய,

மண்ணெண்ணெய் : ரூ. 355 இலிருந்து ரூ. 50 இனால் குறைப்பு - புதிய விலை ரூ. 305

தொழில்துறை மண்ணெண்ணெய் : ரூ. 464 இலிருந்து ரூ. 134 இனால் குறைப்பு - புதிய விலை ரூ. 330

ஆயினும் பெற்றோல், டீசல் உள்ளிட்ட ஏனைய எரிபொருட்களின் விலைகளில் மாற்றமில்லை என அறிவிக்கப்பட்டுள்ளது.

அந்த வகையில்,

பெற்றோல் ஒக்டேன் 95 : ரூ. 510

ஒட்டோ டீசல் : ரூ. 405

மண்ணெண்ணெய் : ரூ. 305

சுப்பர் டீசல் (4 ஸ்டார் யூரோ 4) : ரூ. 510

தொழிற் பயன்பாட்டு மண்ணெண்ணெய் - ரூ. 330

குறித்த விலைக்கு நிகராக, LIOC எரிபொருட்களும் விலைகளும் பேணப்பட்டு வருகின்றமை குறிப்பிடத்தக்கது.

இறுதியாக கடந்த பெப்ரவரி 02 முதல் பெற்றோல் ஒக்டேன் 92: ரூ. 30 இனால் அதிகரிக்கப்பட்டிருந்தது.

அதற்கு முன்பு கடந்த ஜனவரி 03 முதல் டீசல் ரூ. 15 இனாலும்; மண்ணெண்ணெய் ரூ. 10 இனாலும் குறைக்கட்பட்டிருந்தது.

அதற்கு முன்பு டீசல் விலை லீற்றருக்கு ரூ. 10 இனால் குறைக்கப்பட்டிருந்தது.

அதற்கு முன்னதாக கடந்த நவம்பர் 12 முதல் மண்ணெண்ணெய் மற்றும் டீசல் விலைகள் லீற்றருக்கு முறையே ரூ. 25 மற்றும் ரூ. 15 இனால் அதிகரிக்கப்பட்டிருந்தது.

ஒக்டோபர் 17 முதல் பெற்றோல் ஒக்டேன் 92 மற்றும் டீசல் விலைகள் முறையே ரூ. 40, ரூ. 15 இனால் குறைக்கப்பட்டிருந்தது.

கடந்த ஒக்டோபர் 02 முதல் பெற்றோல் ஒக்டேன் 92 மற்றும் 95 விலைகள் முறையே ரூ. 40, ரூ. 30 இனால் குறைக்கப்பட்டிருந்தது.

ஓகஸ்ட் 22ஆம் திகதி மண்ணெண்ணெய் விலை ரூ. 253 இனால் அதிகரித்து ரூ. 340 ஆக திருத்தப்பட்டிருந்தது.

கடந்த ஓகஸ்ட் 02ஆம் திகதி முதல் டீசல் விலை ரூ. 10 குறைக்கப்பட்டு ரூ. 430 ஆக விலைத் திருத்தம் மேற்கொள்ளப்பட்டிருந்தது.