இலங்கை இராணுவத்தின் 73 ஆண்டு நிறைவு : 372 அதிகாரிகள் உள்ளிட்ட 7,499 பேர் அடுத்த தரத்திற்கு தரமுயர்வு

இராணுவத்தின் 73ஆவது ஆண்டு நிறைவு தினமான இன்றைய (10), இராணுவத்தைச் சேர்ந்த 372 அதிகாரிகள் மற்றும் 7,127 வெவ்வேறு தரத்திலுள்ள வீரர்கள் அந்தந்த அடுத்த தரத்திற்கு தரமுயர்த்தப்பட்டுள்ளதாக, இராணுவ ஊடகப் பிரிவு தெரிவித்துள்ளது.

முப்படைகளின் தளபதியான ஜனாதிபதி ரணில் விக்கிரமசிங்கவினால், பாதுகாப்பு அமைச்சு மற்றும் இராணுவத் தளபதி லெப்டினன் ஜெனரல் விக்கும் லியனகேவின் பரிந்துரையின் பேரில் இராணுவத்தின் 73ஆவது ஆண்டு நிறைவு தினமான இன்று (10) இலங்கை இராணுவத்தின் (நிரந்தரம் மற்றும் தொண்டர் படை) 372 அதிகாரிகள் மற்றும் 7,127 சிப்பாய்கள் அடுத்த தரத்திற்கு தரமுயர்த்தப்பட்டுள்ளனர்.

அதற்கமைய, மேஜர் ஜெனரல் தரத்திற்கு 05 பிரிகேடியர்களும், பிரிகேடியர் தரத்திற்கு 23 கேர்ணல்களும், கேர்ணல் தரத்திற்கு 28 லெப்டினன் கேர்ணல்களும், லெப்டினன் கேர்ணல் தரத்திற்கும் 35 மேஜர்களும், மேஜர் தரத்திற்கு 125 கெப்டன்களும், 63 லெப்டினன்கள் கெப்டன் தரத்திற்கும், 93 இரண்டாம் லெப்டினன்கள், லெப்டினன் பதவிக்கும் (நிரந்தர மற்றும் தொண்டர் படை) அதிகாரிகள் பிரிவில் இவ்வாறு தரமுயர்த்தப்பட்டுள்ளனர்.

சிப்பாய்களின் பிரிவில், மொத்தம் 136 அதிகாரம் பெற்ற அதிகாரிகள்-ii அதிகாரம் பெற்ற அதிகாரி -i பதவிக்கும், 624 பதவி நிலை சார்ஜன்கள் அதிகாரம் பெற்ற அதிகாரி -ii பதவிக்கும், 911 சார்ஜன்கள் பதவி நிலை சார்ஜன் பதவிக்கும், 1,250 கோர்ப்ரல்கள் சார்ஜன் பதவிக்கும், 2,199 லான்ஸ் கோர்ப்ரல்கள் கோர்ப்ரல் பதவிக்கும் மற்றும் 2,007 சாதாரண சிப்பாய்கள் லான்ஸ் கோர்ப்ரல் பதவிக்கும் (நிரந்தர, தொண்டர் படை மற்றும் மேலதிக படையணி வேலைவாய்ப்பு அடிப்படையில்) அடுத்த தரத்திற்கு பதவி உயர்வு வழங்கப்பட்டன.

இராணுவத்தில் இரண்டு நட்சத்திர மேஜர் ஜெனரல் தரத்திற்கு உயர்த்தப்பட்ட ஐந்து சிரேஷ்ட பிரிகேடியர்களில் மாதுரு ஓயா இராணுவப் பயிற்சிப் பாடசாலையின் தளபதியான கெமுனு ஹேவா படையணியின் பிரிகேடியர் சேனக கஸ்தூரிமுதலி, இலங்கை மின்சார மற்றும் இயந்திர பொறியியல் பணிப்பகத்தின் பணிப்பாளரான மின்சார மற்றும் இயந்திர பொறியியலாளர் படையணியின் பிரிகேடியர் ரஞ்சன் ஜயசேகர, 66ஆவது படைப்பிரிவின் தளபதியான இயந்திரவியல் காலாட் படையணியின் பிரிகேடியர் ஜனக பிரியதர்ஷன, 14ஆவது படைப்பிரிவின் தளபதியான கெமுனு ஹேவா படையணியின் பிரிகேடியர் ரொஷான் ஜயமன்ன, மற்றும் இலங்கை பீரங்கி படையணியின் தலைமையகத்தில் இணைக்கப்பட்டுள்ள இலங்கை பீரங்கி படையணியின் பிரிகேடியர் ஜானக ரணசிங்க ஆகியோர் அடங்குவர்.