இந்தியா - அவுஸ்திரேலியா அணிகளுக்கான 'பாக்சிங் டே' டெஸ்ட் நாளை ஆரம்பம்

அவுஸ்திரேலியாவில் சுற்றுப்பயணம் மேற்கொண்டு விளையாடி வரும் இந்திய கிரிக்கெட் அணி 4 போட்டிகள் கொண்ட டெஸ்ட் தொடரில் பங்கேற்றுள்ளது.

இதில் அடிலெய்டில் நடந்த முதலாவது பகல் - இரவு டெஸ்ட் போட்டியில் இந்திய அணி 8 விக்கெட் வித்தியாசத்தில் படுதோல்வி அடைந்தது. அதுவும் 2ஆவது இன்னிங்சில் வெறும் 36 ஓட்டங்களில் இந்தியா மோசமான சாதனையை பெற்றது.

இந்தியா - அவுஸ்திரேலியா அணிகள் இடையிலான 2ஆவது டெஸ்ட் கிரிக்கெட் போட்டி உலகின் மிகப்பெரிய மைதானங்களில் ஒன்றான மெல்போர்னில் நாளை (26) இந்திய நேரப்படி நாளை அதிகாலை 5 மணிக்கு தொடங்குகிறது.

கடந்த 20 ஆண்டுகளை எடுத்துக் கொண்டால் 'பாக்சிங் டே' டெஸ்டில் அவுஸ்திரேலியா 15 வெற்றியும், 3 தோல்வியும் 2 டிராவும் கண்டுள்ளது.

தற்போது தொடரில் 0-1 என்ற கணக்கில் இந்திய அணி பின்தங்கி இருக்கும் நிலையில் பதிலடி கொடுக்கும் வகையில் எழுச்சி பெறுமா? என்ற எதிர்பார்ப்பை இந்த டெஸ்ட் உருவாக்கி இருக்கிறது.

மேலும் நியூசிலாந்தின் மவுன்ட் மாங்கானு நகரில் பாகிஸ்தான் - நியூசிலாந்து அணிகள் இடையிலான முதலாவது டெஸ்ட் போட்டி இந்திய நேரப்படி நாளை அதிகாலை 3.30 மணிக்கு தொடங்குகிறது.

இதேபோல் தென் ஆப்பிரிக்கா - இலங்கை இடையிலான டெஸ்ட் போட்டி இந்திய நேரப்படி பிற்பகல் 1.30 மணி செஞ்சூரியனில் நாளை ஆரம்பிக்கிறது. 

இவையும் 'பாக்சிங் டே' போட்டி என்றே அழைக்கப்படுகிறது. இந்த மூன்று டெஸ்ட் போட்டிகளும் உலக டெஸ்ட் சாம்பியன்ஷிப்புக்கு உட்பட்டது என்பது இன்னொரு சிறப்பு அம்சமாகும்.