வெள்ளை மாளிகையை விட்டு நிச்சயம் வெளியேறுவேன், ஆனால் ஒரு கண்டிஷன் - டிரம்ப் செய்தியாளர்களுக்கு பேட்டி

ஜோ பைடன் வெற்றியாளர் என தேர்வாளர் குழு அதிகாரப்பூர்வமாக அறிவித்து விட்டால் வெள்ளை மாளிகையை விட்டு வெளியேறுவேன் என டிரம்ப் செய்தியாளர்களிடம் கூறியுள்ளார்.

அமெரிக்காவில் கடந்த நவம்பர் 3ம் திகதி நடந்து முடிந்த ஜனாதிபதி தேர்தலில் ஜனநாயக கட்சி வேட்பாளர் ஜோ பைடன் வெற்றி பெற்று, அமெரிக்காவின் 46வது ஜனாதிபதியாக தெரிவு செய்யப்பட்டுள்ளார். 

ஜனாதிபதியை தெரிவு செய்வதற்கு, எலக்டோரல் காலேஜ் எனப்படும் தேர்வாளர் குழுவின் 270 உறுப்பினர்களின் வாக்குகளை பெற வேண்டும். பைடன் 306 வாக்குகளும், நடப்பு ஜனாதிபதியான டொனால்ட் டிரம்ப் 232 வாக்குகளும் பெற்றனர். 

ஆனால் டொனால்ட் டிரம்ப் ஜனநாயக கட்சியின் வெற்றியை ஒப்புக் கொள்ளாமல் தொடர் குற்றச்சாட்டுகளை முன் வைத்து வருகிறார். பரவலான தேர்தல் மோசடி குறித்த ஆதாரமற்ற கூற்றுக்களை முன்வைத்து, தேர்தலை ஒப்புக்கொள்ள ஜனாதிபதி டிரம்ப் மறுத்துவிட்டார்.

இந்த நிலையில், பைடன் ஜனாதிபதி என தேர்வாளர் குழு சான்றளித்து விட்டால் வெள்ளை மாளிகையை விட்டு வெளியேறுவீர்களா? என நிருபர் ஒருவர் டிரம்பிடம் கேள்வி எழுப்பினார்.

ஜனாதிபதி தேர்தலில் பைடனிடம் தோல்வி அடைந்த பின் டிரம்ப் முதன்முறையாக செய்தியாளர்களின் கேள்விகளுக்கு பதிலளித்து பேசியுள்ளார். 

நிருபரின் இந்த கேள்விக்கு பதிலளித்த டிரம்ப், ‘வெற்றியாளரை அதிகாரப்பூர்வமாக அறிவித்தால் நிச்சயம் நான் வெள்ளை மாளிகையை விட்டு வெளியேறுவேன். அது உங்களுக்கும் தெரியும். ஆனால் வருகின்ற ஜனவரி 20ம் திகதி வரை பல்வேறு விசயங்கள் நடைபெறும் என நான் நினைக்கிறேன். பெரிய அளவில் நடந்த முறைகேடுகள் கண்டறியப்பட்டு உள்ளன’ என கூறியுள்ளார்.

அமெரிக்காவில் எலக்டோரல் காலேஜ் என்பது ஜனாதிபதியை தெரிவு செய்யக்கூடிய தேர்வாளர்களை கொண்ட ஒரு குழுவாகும். இந்த குழுவினர் அளிக்கும் வாக்குகளுக்கு ஏற்ப பெரும்பான்மை வாக்குகளை பெறும் ஜனாதிபதி வேட்பாளர் வெற்றியாளராக அறிவிக்கப்படுவார்.

இதுபற்றி டிரம்ப் கூறும்பொழுது, வாக்களிக்கும் உட்கட்டமைப்பில் நாம் 3வது உலக நாடு போல் இருக்கிறோம். ஹேக்கிங் செய்யக்கூடிய கணினி சாதனங்களை நாம் உபயோகப்படுத்தி கொண்டிருக்கிறோம் என கூறினார்.

ஜனாதிபதியாக பைடனை எலக்டோரல் காலேஜ் தெரிவு செய்கிறதென்றால், அது பெரிய தவறாகி விடும் என கூறிய டிரம்ப், இந்த தேர்தலில் முறைகேடு நடந்துள்ளது, உயர்மட்ட அளவில் மோசடிகள் நடந்துள்ளன என கூறியுள்ளார்.

புதிய ஜனாதிபதி யார் என்பதை அதிகாரப்பூர்வமாக அறிவிப்பதற்காக, வரும் டிசம்பர் 14ம் திகதி தெரிவாளர் குழுக் கூட்டம் நடைபெற உள்ளது குறிப்பிடத்தக்கது.