முஸ்லிம் காங்கிரஸ் செயலாளரை சந்தித்த ஐரோப்பிய ஒன்றிய பிரதிநிதிகள் : முக்கிய விடயங்களும் கலந்துரையாடப்பட்டது

ஐரோப்பிய ஒன்றிய பிரதிநிதிகள் ஸ்ரீலங்கா முஸ்லிம் காங்கிரஸ் செயலாளரை சந்தித்து கலந்துரையாடினர்.

இன்று (01) ஐரோப்பிய ஒன்றிய (EU) பிரதிநிதிகள், ஸ்ரீலங்கா முஸ்லிம் காங்கிரஸ் செயலாளரும், பாராளுமன்ற உறுப்பினருமான ஜனாதிபதி சட்டத்தரணி நிசாம் காரியப்பரை சந்தித்து முக்கிய கலந்துரையாடலில் ஈடுபட்டனர்.

இந்த சந்திப்பின்போது, இலங்கை தற்போது கடுமையான பொருளாதார நெருக்கடியில் இருந்து மீளும் கட்டத்தில் உள்ளதைக் குறிப்பிடும் அவர், GSP+ வர்த்தக சலுகையின் தொடர்ச்சியான கிடைப்பை முழுமையாக ஆதரிக்கின்றது எனக் கூறினார். குறிப்பாக அமெரிக்காவின் வரி உயர்வுகளுக்கு மத்தியில் இது மிகவும் முக்கியமானதாகவும் அவர் வலியுறுத்தினார்.

அத்துடன், அவர் கீழ்க்காணும் முக்கியமான பிரச்சினைகளை EU பிரதிநிதிகளின் கவனத்திற்கு கொண்டு வந்தார்:

1. பயங்கரவாத தடுப்பு சட்டம் (PTA)

PTA முற்றிலும் இரத்து செய்யப்பட வேண்டியதோடு, சர்வதேச மனித உரிமை தரநிலைகளுடன் ஒத்துச் செல்லும் புதிய சட்டம் கொண்டுவரப்பட வேண்டும் என்றார்.

2. PTA பயன்படுத்துவதில் இடைநிறுத்தம்

புதிய சட்டம் அமலுக்கு வரும் வரை, PTA பயன்படுத்தப்படக்கூடாது. ஈஸ்டர் ஞாயிறு தாக்குதல் தொடர்பான விசாரணைகளுக்கு மட்டும் சிலவிதி விலக்கு இருக்கலாம்.

3. கருத்து சுதந்திரத்தின் பாதுகாப்பு

PTA சட்டம் கருத்து சுதந்திரத்தை அடக்க பயன்படுத்தப்படுவதை கண்டித்த அவர், பாலஸ்தீன ஆதரவு ஸ்டிக்கர் ஒட்டியதற்காக ஒரு முஸ்லிம் இளைஞன் கைது செய்யப்பட்டதைக் குறிப்பிட்டு, அரசாங்கம் மன்னிப்பு கோர வேண்டும் எனக் கூறினார்.

4. மாகாண சபை தேர்தல்கள்

மாகாண சபை தேர்தல்கள் விரைவில் நடத்தப்பட வேண்டும் என்றும், அதற்கான சட்ட ஏற்பாடுகள் மேற்கொள்ளப்பட வேண்டும் என்றும் வலியுறுத்தினார்.

5. ஜனநாயகம் மற்றும் கட்சி அங்கீகாரம்

பாராளுமன்ற உறுப்பினர்கள் எந்தக் கட்சியின் கீழ் தெரிவு செய்யப்படுகிறார்களோ அதே அடிப்படையில் அங்கீகாரம் வழங்கப்பட வேண்டும். ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீமை பாராளுமன்ற குழுத் தலைவராக சபாநாயகர் ஏற்க மறுப்பதை ஐரோப்பிய ஒன்றியம் கண்டிக்க வேண்டும் எனவும் தெரிவித்தார்.

இந்த சந்திப்பு, இலங்கையில் நடந்து வரும் அரசியல் மற்றும் சட்ட அமைப்புக்களுக்கான சர்வதேச கவனத்தை மேலும் திருப்பக்கூடியதாக அமைந்துள்ளது.