மரக்கறிகளை விவசாயிகள் கூறும் தொகைக்கே நாங்கள் வாங்குகிறோம் - நுவரெலியா பொருளாதார மத்திய நிலைய தலைவர்

நாடு முழுவதும் கரட் உள்ளிட்ட மரக்கறிகளின் விலை என்னவாக இருந்தாலும், விவசாயிகள் கூறும் தொகைக்கே நாங்கள் வாங்குகிறோம், நாங்கள் விரும்பும் தொகைக்கு அல்ல என நுவரெலியா பொருளாதார மத்திய நிலையத்தின் தலைவர் தெரிவித்தார்.

நாட்டின் பல்வேறு பகுதிகளில் இயங்கி வரும் பொருளாதார நிலையங்களின் மொத்த விற்பனை விலை பல்வேறு வகையில் குறிப்பிடப்பட்டாலும், நுவரெலியா பொருளாதார மத்திய நிலையத்திலேயே குறைந்த மொத்த விலையே காணப்படுவதாக நுவரெலியா பொருளாதார மத்திய நிலையத்தின் தலைவர் அருணு சாந்த ஹெட்டியாராச்சி தெரிவித்தார்.

நுவரெலியா பொருளாதார மத்திய நிலையத்தில் இன்று புதன்கிழமை (17) இடம்பெற்ற விசேட ஊடகவியலாளர் சந்திப்பில் கலந்துகொண்டு மரக்கறி விலைகள் அதிகரிப்பு மற்றும் மரக்கறி விலைகள் அதிகரிப்பதற்கான காரணங்களை குறிப்பிடும் போதே தலைவர் மேற்கண்டவாறு தெரிவித்தார்.

ஊடகங்களுக்கு கருத்து தெரிவித்த அவர் மேலும் கூறியதாவது, ஏனைய பொருளாதார நிலையங்களில் மரக்கறிகளின் விலை எதுவாக இருந்தாலும் நுவரெலியா பொருளாதார மத்திய நிலையமே மிகக் குறைந்த மொத்த விற்பனை விலையைக் கொண்டிருப்பதை ஏற்றுக் கொள்ள வேண்டும்.

காய்கறி பயிர்ச் செய்கை குறைவதற்கு வானிலை மட்டுமே காரணம் என்று சொல்ல முடியாது. விவசாய ஒழுங்குமுறை அலுவலர்கள், விவசாய அலுவலர்கள் தங்கள் கடமையை சரிவர செய்வதில்லை.

1980 களில் விவசாய ஒழுங்குமுறை அலுவலர்கள், விவசாயத்துறை அதிகாரிகள் சாகுபடி பகுதிக்கு வந்து மண்ணை ஆய்வு செய்து, என்ன விதைகளை நட வேண்டும், என்ன உரம், மருந்துகள் பயன்படுத்த வேண்டும் என விவசாயிகளுக்கு அறிவுரை வழங்கினர்.

தற்போது உர விற்பனையாளரின் சீடன் விவசாய ஆலோசகராக உள்ளார். இந்த அளவு மருந்தை விற்றால் இந்த தொகையை மேலதிகமாக தருகிறோம் என்று அந்த உரக்கடை ஊழியரிடம் பல்வேறு நிறுவனங்கள் விலை பேசுகிறார்கள்.

அடுத்த சிறப்பு என்னவென்றால், தொழில்நுட்பத்தில் மிகவும் நலிவடைந்த நாம், மண்வெட்டி வைத்து விவசாயம் செய்யும் விவசாயிகளை இன்றும் பார்க்கிறோம். வெளிநாடுகளில் உள்ள தொழில்நுட்பத்தை இலங்கை விவசாய சமூகத்திற்கு வழங்கி தேவையான விவசாய அறிவை வழங்கினால் இன்னும் வெற்றிகரமான விவசாயத் தொழிலை நாம் பெற முடியும் என்றார்.