எம்.பிகளுக்கு வீடுகள் வழங்குவதற்கு முன்னுரிமை வழங்காமல் பாதிக்கப்பட்ட மக்களுக்கு நஷ்டஈடு வழங்க வேண்டும் : தாக்குதலுடன் ஐ.ம.ச ஆதரவாளர்கள் தொடர்புபட்டிருந்தால் கடும் நடவடிக்கை - சஜித் பிரேமதாஸ

எம்.பிகளின் வீடுகளை தாக்கி அழித்த அனைவரையும் கைது செய்து கடுமையான தண்டனை வழங்க வேண்டும் எனவும் தனது கட்சி ஆதரவாளர்கள் இதனுடன் தொடர்புபட்டிருந்தால் தமது கட்சி உரிய நடவடிக்கை எடுக்கும் எனவும் எதிர்க்கட்சித் தலைவர் சஜித் பிரேமதாஸ  தெரிவித்தார்.

வீடுகளை இழந்த எம்.பிகளுக்கு வீடுகள் வழங்குவதற்கு முன்னுரிமை வழங்காமல் பாதிக்கப்பட்ட மக்களுக்கு நஷ்டஈடு வழங்க வேண்டும் எனவும் அவர் குறிப்பிட்டார்.

பாராளுமன்றத்தில் நேற்று உரையாற்றிய அவர், பிரதமர் பதவி விலகுவதை முன்னிட்டு நடந்த கூட்டத்தின் பின்னர்தான் வன்முறை வெடித்தது. எம்.பி ஒருவர் கொல்லப்பட்டார். 30 நாட்களுக்கு மேல் அமைதியாக நடந்த ஆர்ப்பாட்டத்தின் மீதான தாக்குதலின் பின்னரே வன்முறை வெடித்தது. 9 ஆம் திகதி நடைபெற்ற அசம்பாவிதங்களுடன் தொடர்புள்ள அனைவரையும் கைது செய்து கடுமையான தண்டனை வழங்க வேண்டும்.

எம்.பிகளுக்கு வீடுகள் வழங்க முன்னுரிமை வழங்குவதாக வீடமைப்பு அமைச்சர் பிரசன்ன ரணதுங்க கூறியிருந்தார். ஆனால் கேஸ் வெடிப்பு, வயல் நிலங்கள் சேதம் காரணமாக பாதிக்கப்பட்ட மக்களுக்கு நிவாரணம் வழங்கவே அரசாங்கம் முன்னுரிமை அளிக்க வேண்டும்.

வீடுகள் அழிக்கப்பட்டதற்கு எதிராக சர்வதேச பாராளுமன்றத்திற்கு செல்ல வேண்டும் என பந்துல குணவர்தன கோரினார். மனித உரிமை ஆணைக்குழுவுக்கு செல்ல வேண்டும் என்றார். ஆனால் தமிழ் ஊடகவியலாளர்கள் காணமல் போனதற்கு எதிராகவும் லசந்த கொல்லப்பட்டதற்கு எதிராகவும் அங்கு சென்றவர்களை தேசத்துரோகிகள் என்றார்கள்.

காலி முகத்திடலிலும் அலரி மாளிகைக்கு அருகிலும் நடந்த தாக்குதலின் பின்னரே வன்முறை வெடித்தது. அந்த தாக்குதலுக்காக மாலை நடந்து தாக்குதலை நியாயப்படுத்த முடியாது.

எமது கட்சியினர் தாக்குதல்களில் தொடர்புபட்டிருக்கவில்லை. அவ்வாறு யாராவது தொடர்பட்டிருந்தால் அவர்களுக்கு கட்சி அடிப்படையில் விசாரணை நடத்தி நடவடிக்கை எடுப்போம். எமது கட்சி வன்முறைகளுடன் தொடர்புபட்ட கட்சி அல்ல என்றார்.

அத்துடன் பிரதமர் தட்டுப்பாடாகி இருக்கும் மருந்து வகைகளில் ஒரு மருந்தை எமது மூச்சு வேலைத்திட்டம் மூலம் பெற்றுத்தருமாறு கோரி இருந்தார். அவரின் கோரிக்கை தொடர்பில் பரிசீலிக்க நாங்கள் தயார். 

எமது சக்திக்கு உட்பட்டதையே எமக்கு பொறுப்பேற்கலாம். ஏனெனில் நாங்கள் எதிர்க்கட்சியிலே இருக்கின்றோம். அதனால் உயிர் பாதுகாப்பு தொடர்பான மருந்துகளை விநியோகிப்பதற்கு எங்களால் முடிந்த நடவடிக்கைகளை எடுப்போம். முழு நாட்டுக்கும் அதனை எங்களால் செய்ய முடியுமா என தெரியாது.

அத்துடன் எமது கட்சி 24 மணி நேரமும் உங்களை மட்டம் தட்டி வீழ்த்த திட்டமிடத் தேவையில்லை உங்களுக்கு பாராளுமன்றத்தில் ஒரு ஆசனம்தான் இருக்கின்றது. நீங்கள் ஐக்கிய தேசிய கட்சியின் எனது அரசியல் தலைவர். எமது முன்னாள் பிரதமர். தலைவர்களை மதிக்க எனது தந்தை கற்றுத் தந்துள்ளார். எனது முன்னாள் தலைவரான புதிய பிரதமருக்கு உதவ தயாராக இருக்கிறோம். என்றாலும் உங்களை சிலர் பகடைக்காயாக பயன்படுத்தி வருகின்றனர் என்றார்.

(லோரன்ஸ் செல்வநாயகம்,ஷம்ஸ் பாஹிம்)