12 நாடுகளுக்கான கடிதத்தில் கையெழுத்திட்டேன் : அமெரிக்க ஜனாதிபதி ட்ரம்ப்

12 நாடுகளுக்கு புதிய வரியை விதித்து எழுதப்பட்ட கடிதங்களில் அமெரிக்க ஜனாதிபதி டொனால்ட் ட்ரம்ப் கையெழுத்திட்டார். 

இந்த வரி விதிப்பை ஏற்றுக் கொள்வது என்றால் ஏற்றுக் கொள்ளுங்கள், இல்லையேல் கைவிடுங்கள் என்றும் அவர் கூறியுள்ளார்.

அமெரிக்க ஜனாதிபதியாக ட்ரம்ப் பொறுப்பேற்ற உடன், பல்வேறு நாடுகளுக்கான இறக்குமதி வரியை பலமடங்கு உயர்த்தினார். இதற்கு கடும் அதிருப்தி நிலவியதால், 90 நாட்களுக்கு தற்காலிகமாக வரி உயர்வை நிறுத்திவைத்த அவர், இந்த காலக்கெடு முடிவதற்குள் அமெரிக்காவுடன் ஒப்பந்தம் ஏற்படுத்திக் கொள்ள அழைப்பு விடுத்தார்.

இதையடுத்து, பிரிட்டன் உடனான ஒப்பந்தம் மட்டுமே இறுதி செய்யப்பட்ட நிலையில், ஏனைய நாடுகள் அமெரிக்காவுடன் பேச்சுவார்த்தை நடத்தி வருகின்றன. இந்தக் காலக்கெடு ஜூலை 9ல் முடிவடைய உள்ளதால், பல்வேறு நாடுகள் ஒப்பந்தம் மேற்கொள்ள தீவிர முயற்சிகளை மேற்கொண்டு வருகின்றன.

இந்த நிலையில், நியூ ஜெர்சி மாகாணத்திற்கு புறப்பட்ட அமெரிக்க ஜனாதிபதி ட்ரம்ப், 12 நாடுகளுக்கான புதிய வரி விதிப்புக்கான கடிதங்களில் கையெழுத்திட்டு விட்டதாக கூறியுள்ளார்.

 மேலும், அவர் கூறுகையில், '12 நாடுகளின் பெயர்கள் திங்கட்கிழமை வெளியிடப்படும். அன்றைய தினம் அந்தந்த நாடுகளுக்கு கடிதம் அனுப்பப்பட்டு விடும். இதை ஏற்றுக் கொள்வது என்றால் ஏற்றுக் கொள்ளுங்கள், இல்லையேல் கைவிட்டு விடுங்கள். ஒப்பந்தத்தில் கையெழுத்திடாத நாடுகளுக்கு 70 சதவீதம் வரையில் வரிவிதிப்பு இருக்கும். ஓகஸ்ட்1 முதல் இந்த புதிய வரி நடைமுறைக்கு வரும்,' என்றார்.

"நான் மீண்டும் தேர்ந்தெடுக்கப்பட்டதிலிருந்து நமது நாடு ஏற்கனவே வளர்ந்ததை விட, இன்னும் அதிக வளர்ச்சியைக் காணப்போகிறது" என்று குறிப்பிட்டுள்ளார்.

“Big Beautiful Bill" என பெயரிடப்பட்டுள்ள புதிய வரி சட்டத்தில் அமெரிக்க ஜனாதிபதி டொனால்ட் ட்ரம்ப் கையொப்பமிட்டுள்ளார். இது செலவு மற்றும் வரி தொடர்பான ஒரு வரிச் சட்டமாகும்.

இந்த புதிய வரிச் சட்டம் அமெரிக்காவின் வளர்ச்சிக்கு உதவும் என்று கூறப்படுவதுடன் இதற்கு எதிராக விமர்சனங்களும் எழுந்து உள்ளன.

இந்த வரிச் சட்டத்தில் டிரம்ப் தனது இரண்டாவது ஆட்சிக்காலத்தில் செய்ய நினைத்த பல முக்கியமான விஷயங்கள் உள்ளன. “Big Beautiful Bill" என்ற புதிய வரி சட்ட மூலம் ஜூலை மாதம் 4 ஆம் திகதி அமெரிக்க பிரதிநிதிகள் சபையில் 218 - 214 என்ற வாக்கு வித்தியாசத்தில் நிறைவேற்றப்பட்டுள்ளது.

டிரம்ப் கையெழுத்திட்டுள நிறைவேற்றப்பட்டுள்ள “Big Beautiful Bill" என்ற புதிய வரிச் சட்டம் அமெரிக்காவில் பெரிய மாற்றங்களை கொண்டுவர உள்ளது. இது அமெரிக்காவின் பொருளாதாரம் மற்றும் சமூகத்தில் பல தாக்கங்களை ஏற்படுத்தும் என்று எதிர்பார்க்கப்படுகிறது.